काठमाडौँ । आउँदो भदौको अन्तिम सातादेखि काठमाडौँस्थित आरआर क्याम्पसमा अन्तरक्याम्पस स्तरीय राष्ट्रिय पुरुष भलिबल प्रतियोगिता सुरु हुने भएको छ ।

आरआर क्याम्पस स्वतन्त्र विद्यार्थी युनियन (स्ववियु)को आयोजनामा हुने उक्त प्रतियोगिता भदौ २२ देखि भदौ २७ गतेसम्म सञ्चालन हुनेछ । प्रतियोगितामा देशभरका १५ भन्दा बढी क्याम्पसले सहभागिता जनाउने अपेक्षा गरिएको आयोजक रत्न राज्‍यलक्ष्मी क्याम्पसका स्ववियु अध्यक्ष लोकेश कुमार खड्काले जानकारी दिए । 

प्रतियोगितामा सहभागी हुन चाहने टोलीहरूले भदौ २० गतेभित्र दर्ता सकाउनुपर्नेछ । सहभागी टोलीको संख्याअनुसार खेल प्रणाली तोकिनेछ । १२ भन्दा बढी टोली भएमा खेल नकआउट प्रणालीमा हुनेछ र प्रत्येक खेल ५ सेटको आधारमा खेलाइनेछ । तर, १२ भन्दा कम टोली भएमा प्रतियोगिता लिग प्रणालीमा हुनेछ र त्यतिबेला खेल ३ सेटको आधारमा खेलाइनेछ ।

पुरस्कार राशी पनि आकर्षक तोकिएको छ । विजेता टोलीले रु ३ लाख, उपविजेताले रु २ लाख, तेस्रो हुने टोलीले रु १ लाख प्राप्त गर्नेछन् । साथै, प्रतियोगितामा उत्कृष्ट प्रदर्शन गर्ने खेलाडीलाई विभिन्न व्यक्तिगत विधामा विशेष सम्मान पनि प्रदान गरिने स्ववियु अध्यक्ष लोकेश खड्काले जानकारी दिएका छन् ।