काठमाडौँ । नेपाली कांग्रेसका महामन्त्री तथा प्रतिनिधिसभा सदस्य गगन कुमार थापाले लिपुलेकका सम्बन्धमा भारत र चीनले गरेको सहमति स्वीकार्य नभएको बताएका छन् । प्रतिनिधिको बैठकमा आफ्ना भनाई राख्दै महामन्त्री थापाले भारत र तीनको कदम आपत्तिजनक भएको बताएका हुन् । 

‘नेपाली कांग्रेस पार्टी दुई छिमेकीले गरेको व्यवहारप्रति गम्भीर असहमति प्रकट गर्दछ । यो आपत्तिजनक छ, अस्विकार्य छ । नेपाल सरकारले यसका सन्दर्भमा जुन पहलकदमी अगाडि बढाएको छ, सबैलाई समेटेर अगाडी बढाओस् ।’ 

उनले यो विषयमा सबै राजनीतक दलहरुलाई एकढिक्का हुन अह्वान गरेका छन् । यसलाई घरेलु राजनीतिको विषय बनाउनु नहुने भन्दै सबै दलहरु एकठाउँमा बसेर हामी हाम्रो भूमिमाथि आँखा लगाउने कुरा स्वीकार्य छैन भन्ने सन्देश भारत र चीनलाई दिनुपर्ने बताएका हुन् । 

उनले भने, ‘यो विषयमा नेपालका सबै राजनीतिक दलहरु एकठाउँमा उभिनुपर्छ । हिजो पनि उभियौँ । आज पनि उभिन पर्नेछ । म नेपाली कांग्रेस पार्टीको तर्फबाट सबै दलहरुलाई आग्रह पनि गर्न चाहन्छु । हाम्रो प्रतिष्पर्धा आफ्ना ठाउँमा छन्, हामी कोही पनि यो विषयलाई घरेलु राजनीतिको विषय नबनाऔँ । उग्र राष्ट्रवादी हुने तर्फ पनि हामी नलागौँ । यो विषयमा हामी राजनीतिक दलहरु एक ठाउँमा उभिएर सन्देश दिनुपर्ने छ, कि हाम्रो भूमिमा आँखा लगाउने कुरा हामी कसैलाई पनि स्वीकार्य छैन, नेपालले यसको प्रतिवाद गर्छ ।’