रवि भन्छन्ः 'यो देशमा शक्ति पृथकीकरण समाप्त भैसक्यो, एउटै रावणका फरक टाउका गन्न छाडिदेउ'

काठमाडौँ । राष्ट्रिय स्वतन्त्र पार्टीका सभापति रवि लामिछानेलाई जमानतमा छोड्नुपर्ने माग गर्दै  पत्नी निकिता पौडेलले उच्च अदालतको ढोका ढक्ढकाएको बताएकी छिन् । 

Watch On

बिगो बराबरको रकम धरौटी राख्दा पनि जिल्ला अदालत रुपन्देहीले लामिछानेलाई छाडन् नमानेपछि आफूले उच्च अदालत पुगेको उनले सामाजिक सञ्जालमा स्टाटस लेखेर जानकारी दिएकी छिन् । 

रविको जीवन सुरक्षीत नभएको भन्दै पौडेलले रविलाई बिगो तोकेर त्यो बराबरको बैंक जमानत लिएर जलेबाहिरबाट मुद्दा लडन् दिन आग्रह गरेकी छिन् । उनले लेखेकी छिन्, ‘मैले हिजो पनि भनेकी हुँ र आज पनि भन्छु, मेरो श्रीमानको जीवन सुरक्षित छैन। भैरहवा कारागारमा उहाँलाइ कसरी राखिएको थियो, अब मैले केही भनिरहन पर्दैन । यिनिहरुले किन जेल सार्न मानिरहेका थिएनन्, यिनिहरुको नियत के थियो, त्यो पनि बताइरहन पर्दैन ।

पौडेलले लेखेकी छिन्, ‘आज मैले उच्च अदालत, बुटवलको ढोका पनि ढक्ढक्याएँ । मेरो श्रीमान भन्नुहुन्छ, ‘यो देशमा शक्ति पृथकीकरण समाप्त भएको धेरै भइसक्यो, एउटै रावणका फरक टाउका गन्न छाडिदेउ ।’ तर, श्रीमतीका रुपमा मेरो पनि जिद्दी छ, न्याय पाइयोस कि नपाइयोस, म संविधान र कानुनले अनुमति दिएका देशभित्र र बाहिरका न्यायका हरेक ढोका ढक्ढक्याउने छु ।’

साथै उनले झुटा मुद्दा लगाएर सत्ता र शक्तिको दुरुपयोग गरेर जेलमा थुनेका बन्दीलाई प्रधानमन्त्रीदेखि महामन्त्रीसम्मले संसदको रोष्ट्रमबाट धम्काइरहेको विषय समेत उल्लेख गरेकी छिन् । उनले भनेकी छिन्, आफैंले झुटा मुद्दा लगाएर, सत्ता र शक्तिको चरम दुरुपयोग गरेर जेलमा थुनेको एउटा बन्दीलाई प्रधानमन्त्रीदेखि महामन्त्रीसम्मले संसद्को रोष्ट्रमबाट किन धम्क्याइरहेका होलान्, त्यो पनि अब मैले भनिरहन पर्दैन,’।