जडीबुटीको पास बनाएर हुम्ला हुँदै चीनबाट भित्रियो १० करोडको अवैध भेप

नेपालगंज ।  हुम्लाबाट जडीबुटी लोड गरिएको भन्दै पठाइएको एक कन्टेनरमा ठूलो मात्रामा तस्करीका विद्युतीय चुरोट (भेप) बरामद भएको छ। राजस्व अनुसन्धान विभाग र सशस्त्र प्रहरी बल (एपीएफ)को संयुक्त टोलीले निगरानी गर्दै आएको कन्टेनर नियन्त्रणमा लिएर खोल्दा करिब ४० हजार थान भेप र २४ सय केजी सेतक चिनी भेटिएको हो।

Watch On

बरामद गरिएका वस्तुमध्ये ईएलएफबीएआर ब्रान्डका ३९ हजार ९ सय थान भेप मात्रै करिब १० करोड रुपैयाँ बराबरको पर्ने प्रारम्भिक अनुमान गरिएको छ।

वन कार्यालयकै पासमा तस्करी

हुम्लाको डिभिजन वन कार्यालय सिमकोटले कन्टेनरलाई नेपालगन्जसम्म ल्याउन पास उपलब्ध गराएको थियो। निमित्त डिभिजनल वन अधिकृत लोकजंग शाहीको निर्देशनमा तयार गरिएको पासमा जडीबुटी र ५ हजार किलो सेतक चिनी उल्लेख गरिएको थियो। प्रतिकेजी २५ रुपैयाँका दरले एक लाख २५ हजार राजस्व बुझाएर कन्टेनर जाँचपास गरिएको थियो।

तर सुरुदेखि नै शंकास्पद गतिविधि देखिएको भन्दै राजस्व र सशस्त्र प्रहरीले कन्टेनरलाई दैलेखबाट नियन्त्रणमा लिएका थिए। त्यसपछि नेपालगन्ज ल्याएर जाँच गर्दा चीनबाट ताक्लाकोट हुँदै भेप  भित्र्याइएको खुलेकाे थियाे । 

मिलेमतोको आशंका

राजस्व अनुसन्धान विभागका अनुसार वन कार्यालयका केही कर्मचारीको मिलेमतोमा नै तस्करी सम्भव भएको देखिन्छ। फरेस्टर सन्तोष खत्री र कर्मचारी कृष्णबहादुर हमालले जाँचपासका लागि पत्र तयार पारेको समेत खुलेको छ।

स्रोतका अनुसार, जडीबुटी व्यवसायको आवरणमा गैरकानुनी धन्दा सञ्चालन गरिएको र कैलाश–ईश्वर जडीबुटी खरिदबिक्री केन्द्रका सञ्चालक कुन्साङ दोर्जी लामाले कन्टेनर पास गराएको पाइएको छ। उनीमाथि थप अनुसन्धान भइरहेको विभागले जनाएको छ।