सिधाकुरालाई भौतिक आक्रमणको धम्की

काठमाडौँ । सिधाकुरा डटकम र यसका सम्पादक नवीन ढुंगानालाई समाचार सम्प्रेषण गरेकै आधारमा भौतिक आक्रमणको धम्की आएको छ । 

नेपाली कांग्रेसका सभापति एवम् पूर्व प्रधानमन्त्री शेरबहादुर देउवाको घरमा भेटिएको जलेको अवस्थाको रकमबारे रिर्पोटिङ गरेको भन्दै एक अपरिचित व्यक्तिले सिधाकुरामा आगो लगाउने र सम्पादकलाई ज्यान लिने धम्की दिएका हुन् ।

बिहीबार बिहानै देखि सानू भाइ नामक फेसबुक अकाउन्टबाट सिधाकुराको आधिकारिक म्यासेन्जरमा उक्त खाले धम्कीहरू आइरहेका छन् ।

म्यासेन्जरमा पठाइएको धम्कीपूर्ण म्यासेजमा देउवाको घरमा जलेको पैसाबारे भ्रमपूर्ण समाचार सम्प्रेषण गरिएको दाबी गरिएको छ । यस्तै, समाचार प्रकाशन प्रसारण नरोके सिधाकुराको कार्यालयमा डिजेल खन्याएर आगो लगाउने र समाचार प्रस्तुत गर्नेलाई छाला काढ्ने धम्कीमा भनिएको छ ।

‘यो मान्छे को हो यसको छाला कसरी निकाल्छु हेर्दै जाउ’ समाचारको भिडियोको लिङ्क पठाएर धम्काइएको छ । यस्तै ति व्यक्तिले सिधाकुराको अफिस कहाँ हो भन्दै डिजेल हालेर आगो लगाउने पनि धम्की दिएका छन् । उनले बाँच्न मन भए आफूहरूको विरुद्धमा लाग्न छोड्न पनि म्यासेजमा भनेका छन् । ‘कहाँ छ तिमिहरुको अफिस डिजेल हालेर पोलिदिन्छु । बाँच्न मन छ भने हाम्रो विरुद्ध आउन छोड,’ धम्कीमा भनिएको छ ।

यो समाचार तयार पार्दासम्म उक्त पेजबाट थप ६ वटा अडियो म्यासेजमार्फत थप धम्कीहरू दिइएको छ । अडियोमा पनि लिखित जस्तै धाक र धम्की दिइएको छ । 

उक्त धम्कीपछि सिधाकुरा र सम्पादक ढुंगानाले नेपाल प्रहरीको साइबर अपराध ब्यूरोलाई घटनाबारे जानकारी गराउँदै पीडकलाई कारबाही माग गर्दै निवेदन दिएका छन् । 

सिधाकुरा जलाउने र सम्पादकलाई ज्यान मार्ने धम्की दिनेलाई कानुन बमोजिम कारबाही गर्न निवेदनमा माग गरिएको छ । धम्की र त्रासको अवस्थाबारे सिधाकुराले नेपाल पत्रकार महासंघ र काठमाडौँ उपत्यका प्रहरी कार्यालयलाई पनि जानकारी गराएको छ ।