रवि, कुलमान, बालेन, हर्क लगायत नयाँ शक्तिलाई एक हुन सुदन गुरुको आह्वान

काठमाडौँ । नयाँ शक्तिहरु एक ठाउँमा जोडिएर अघि बढ्न हामी नेपालका संयोजक सुदन गुरुङले आह्वान गरेका छन् । सम्पूर्ण नेपाली जनताको एउटै चाहना रहेको र त्यसका लागि उहाँहरु सबै एकै ठाउँमा सँगै उभिन उनले आग्रह समेत गरेरका छन् ।

Watch On

गोरखाबाट एकताको यात्रा सुरु भएर नेपाल बनेको स्मरण गर्दै त्यही गोरखा मन्दिरबाट आशीर्वाद लिएर सबैलाई एउटै मञ्चमा उभ्याउने अभियान सुरु गर्ने गुरुङले बताएका छन् ।

उनले भने, ‘हामी सार्वजनिक रूपमा हर्क साम्पाङ, बालेन शाह, रवि लामिछाने, कुलमान घिसिङ, सुमना श्रेष्ठ र सागर ढकाल साथै समाजमा मन जितेका व्यक्तित्वलाई आह्वान गर्न चाहन्छौं।’

राष्ट्रको हित र आगामी पुस्ताको भविष्यका लागि पनि सबै नयाँ शक्तिहरु एक ठाउँमा आउन जरुरी रहेको उनले बताएका छन् । उनले भने, ‘देशका ७ वटै प्रदेश, ७७ वटै जिल्ला र स्थानीय तह देखि वडा स्तरसम्म जेन जी एकजुटता सम्पन्न भइसकेको छ । अब हामी चाहन्छौं अन्य नेपालीहरू पनि यस नेपाल परिवर्तन अभियानमा जोडिउन् । पार्टी प्रेमी होइन, देशप्रेमी नेपालीहरू एकजुट हुन जरुरत छन् ।’

त्यस्तै, छिट्टै नै परिवर्तन चाहने सबै नेपालीलाई एकजुट गर्नका लागि आफुहरुले चाडैंनै डिजिटल प्लेटफर्म पनि सार्वजनिक गर्ने बताए। जसलाई आफुहरुले अभियानको दोस्रो चरणका रुपमा लिएको र यसैका माध्यमबाट जनताले विश्वास गरेका सबै जिम्मेवार व्यक्तिहरूलाई एउटै ठाउँमा ल्याउने प्रयत्न रहेको गुरुङले बताए ।