गोली नहानेर जनता बचाउने नेपाली सेना र सुरक्षा निकायलाई बदनाम गर्न खोजिदैँछ ः रवि

भरतपुर।चितवन। राष्ट्रिय स्वतन्त्र पार्टी (रास्वपा) का सभापति रवि लामिछानेले भदौ २४ मा नेपाली सेनासहितका सुरक्षा निकायले संयमपूर्वक जनताको जीवन जोगाएको बताएका छन् । 

Watch On

भदौ २३ को नरसंहार विरुद्ध जनता जागेपछि त्यसलाई सुरक्षा निकायले सहयोग गरेको उनले बताए । शनिवार चितवनको भरतपुरमा आयोजित स्वागत सभामा बोल्दै सभापति लामिछानेले यस्तो बताएका हुन् ।

राष्ट्र कमजोर बनाउन नेपाली सेना लगायतका सुरक्षा निकायमाथि आरोप थोपरिएको भन्दै उनले त्यसबाट हतोत्साही नबन्न र उच्च मनोबलका साथ रहन सुरक्षा निकायलाई आग्रह गरे । 

‘भदौ २४ मा नेपाली सेनाले संयमपूर्वक जनता जोगाएको हो । जनतालाई गोली नहानेको हो । सेनालाई सम्मान गर्नु पर्ने हो तर अहिले सेनालाई विवादमा तान्न जवरजस्त प्रयास भइरहेको छ,’ लामिछानेले भने,'राष्ट्रलाई कमजोर पार्न यि निकायहरूलाई आक्रमण गर्न बन्द गर्नुहोला । '

प्रहरी लगायतका सुरक्षा निकायलाई उनले हरेक आन्दोलनमा पेलाइमा पर्ने र दुःख पाउने अवस्था सधैँ नरहने कुरामा आश्वस्त हुन आग्रह गरे । अब देखि भ्रष्टाचारको आहालमा डुबेकालाई सलाम गर्न पर्ने छैन् भन्दै उनले प्रहरीलाई जनताको शासन निर्वाचनबाट स्थापित भएको दिन सबैको भलो हुने र सबैले न्याय पाउने बताए । 

जेनजी आन्दोलनमा ज्यान गुमाएका प्रहरीप्रति श्रद्धाञ्जली व्यक्त गर्दै लामिछानेले घाइतेहरूलाई शिघ्र स्वास्थ्य लाभको कामना गरे ।