डा.नवराज लम्साल सम्मानित

काठमाडाैँ । मधुश्री प्रतिष्ठानले डा. नवराज लम्सालसहितका व्यक्तिहरूलाई सम्मानित गरेको छ । प्रा.डा.उर्मिला प्याकुरेल मधुश्री प्रतिष्ठानले विभिन्न प्राज्ञिक तथा साहित्यिक व्यक्तित्वलाई प्रतिष्ठानको प्रथम वार्षिक साधारण सभाको अवसर पारेर शनिबार काठमाडौँमा सम्मानित तथा पुरस्कृत गरेको हो । 

क्यान्सरका कारण गत वर्ष निधन हुनुभएकी प्रा. डा. तथा गणितविज्ञ उर्मिला प्याकुरेल तथा साहित्यिक उपनाम मधुश्रीको स्मृतिमा स्थापना गरिएको प्रतिष्ठानले लम्सालसहितका व्यक्तिहरूलाई सम्मान र पुरस्कार प्रदान गरेको हो । 

साहित्यकार लम्साललाई नेपाली साहित्यको उन्नयनमा योगदान पु¥याएवापत कदरपत्रसहित सम्मानित गरिएको हो । त्यस्तै, त्रिभुवन विश्वविद्यालयबाट गणित विषयमा उच्च अङ्कसहित सर्वोत्कृष्ट हुने ध्रुव पौडेल र भुवनेश्वरी गिरी, सन्देश ठकुरी, जयन्ती साउदलाई २५ हजार रुपियाँ र कदरपत्रसहित पुरस्कृत गरिएको थियो । 

त्यस्तै, विश्वविद्यालय स्तरीय शोधपत्र लेखनका लागि एलिना श्रेष्ठ र जयन्ती साउदलाई दस हजार रुपियाँका दरले अनुदान सहयोग प्रदान गरिएको थियो । 

प्याकुरेलले बाल्यकालमा अध्ययन गरेको विद्यालयबाट उत्कृष्ट अङ्क ल्याउने सिन्धुपाल्चोकको कालिका प्राविकी छात्रा अनुजा शाहीलाई १० हजार रुपियाँ र बाघभैरव माविका प्रविण राईलाई १५ हजार रुपियाँसहित पुरस्कृत गरिएको थियो । 

सो अवसरमा प्रतिष्ठानद्वारा प्रकाशित मधुश्रीका गीत तथा कविता सङ्ग्रह मधुरस र उहाँका दाजु उद्धव प्याकुरेलको किशोर उपन्यास तक्माको पनि विमोचन गरिएको थियो । 

प्याकुरेलको उपचारार्थ सङ्कलित रकमसहितको अक्षयकोष स्थापना गरेर प्राज्ञिक, साहित्यिक तथा स्वास्थ्य समाजसेवामा प्रतिष्ठानले काम सुरु गरेको अध्यक्ष प्रा.डा. टंकनाथ धमलाले जानकारी दिए ।

धमलाले अक्षयकोषको रकमलाई वृद्धि गर्दै लैजान संरक्षण सदस्यका रुपमा थप सहयोग रकम सङ्कलन सुरु भएको बताए । आगामी वर्ष प्याकुरेलको स्मृतिमा स्मारिका प्रकाशन, उनका कथाहरू सङ्कलन गरी सङ्ग्रह प्रकाशनसहित शिक्षा तथा स्वास्थ्यका क्षेत्रमा काम गर्ने प्रतिष्ठानको योजना रहेको पनि उनको भनाई छ ।

कार्यक्रमका प्रमुख अतिथि तथा बरिष्ठ क्यान्सर चिकित्सक राजेन्द्रप्रसाद बरालले उच्च मनोबलका कारण लामो समय क्यान्सर जितेर आफू र अरुलाई समेत बाँच्नका उर्मिलाले प्रेरित गर्नु भएको स्मरण गरे । डा.नवराज लम्सालले बालखैदेखि अध्ययनसँगै साहित्य लेखनमा सक्रिय मधुश्रीका रचनामा नेपाली माटोको सुवास भेटिने गरेको स्मरण गरे ।