श्रम शोषणसँगै बालिका करणी आरोपमा कुलेश्वर आवास क्षेत्रबाट ५४ वर्षिय पुरुष पक्राउ

काठमाडौँ । बालिकालाई करणी आरोपमा कुलेश्वर आवास क्षेत्रबाट ५४ वर्षिय पुरुष पक्राउ परेका छन् । बालिकाले आफू जोखिममा रहेको सूचना दिएपछि काठमाडौँ महानगरपालिकाको अनुगमन टोलीले तयार पारेको प्रतिवेदनका आधारमा आरोपित पुरुषलाई प्रहरीले पक्राउ गरेको हो । 

Watch On

गएको ६ बर्षदेखि त्यही घरमा आफू घरेलु कामदारका रुपमा रहेको र गएको ३ वर्षदेखि आफूमाथि जवर्जस्ती करणी गरिरहेको बालिकाले बताएकी छन् । उनी अहिले १७ वर्षकी छिन् ।  

काठडमाडौँ महागरका प्रमुखको सचिवालय सदस्य धिरज जोशीका अनुसार सार्वजनिक यातायात क्षेत्र, होटल रेष्टुरेन्ट तथा होस्टलमा रहेका बालश्रमिक र आफ्ना नातागोताबाहेक अन्य व्यक्तिसँग बसेका बालबालिका सम्बन्धी जानकारी लिन महानगरले इन्टर्न विद्यार्थीहरुको टोली परिचालन गरेको छ । उनीहरुले बालबालिकाहरुबारे जानकारी लिने गरेका छन् । उक्त जानकारीपछि महानगरको संयुक्त अनुगमन टोलीले प्रतिवेदन तयार गर्छ । अनुगमनपछि तयार पारिएको प्रतिवेदनले बालिकामाथि यौनजन्य दुव्र्यवहार भएको देखिएको जोशी बताउँछन् । ‘यो प्रतिवेदन आफैँमा जाहेरी हो । हामीले बालिकाका अभिभावकलाई पनि बोलाएका छौँ । अब कारवाही प्रक्रिया अगाडि बढ्छ’, जोशीले भने ।  

आरोपित व्यक्तिलाई कालीमाटी प्रहरी वृत्तमा राखिएको छ । 

महानगरले अहिलेसम्म जोखिममा रहेका २७ जना बालिका र २४ जना बालक गरी ५१ जना बालबालिकालाई  उद्धार गरेको छ । जसमध्ये २३ जनालाई अस्थायी संरक्षण गृहमा राखिएको छ । सुरक्षा, शिक्षादीक्षा तथा स्वास्थ्योपचार सुनिश्चित गरेर बाँकीलाई पारिवारिक पुनर्मिलन गराइएको जोशीले जानकारी दिए । 

सिधाकुराका सामाग्री युट्युुब च्यानलमा पनि हेर्न सक्नुहुने छ ।