शिक्षक महासंघ र सरकारबिचको सहमतिप्रति शिक्षकहरु नै असन्तुष्ट, आन्दोलनका कार्यक्रम सार्वजनिक गर्ने चेतावनी

काठमाडौँ । बुधबार राति भएको नेपाल शिक्षक महासंघ र सरकारबिच भएको सहमतिमा शिक्षकहरुले नै असन्तुष्टि जनाएका छन् । आन्दोलन सुरु गरेदेखि बुधबारसम्म ऐन नपाए आफूहरु विद्यालय नफर्किने अडान कसेका शिक्षकहरु ऐन नल्याई महासंघले सरकारसँग सहमति गरेको भन्दै असन्तुष्ट जनाएका हुन् ।

Watch On

महासंघको सो कदमप्रति असन्तुष्ट जनाउँदै नेपाल विद्यालय कर्मचारी परिषद्ले एक विज्ञप्ति निकालेर सहमतिको विरोध जनाएको छ ।

परिषदका अध्यक्ष र महासचिवले संयुक्त हस्ताक्षर गरेर निकालिएको विज्ञप्तीमा आफूहरुको संस्थागत धारणा बाहेकको सहमतिको घोर भत्सर्ना गर्ने जनाएको छ । ‘सरकार र नेपाल शिक्षक महासंघबीच भएको वार्ता र फिर्ता गरिएको आन्दोलनको कार्यक्रमको विषयमा नेपाल विद्यालय कर्मचारी परिषद्, राष्ट्रिय समितिको पूर्णरूपमा असहमति रहेको व्यहोरा सबैमा जानकारी गराउँदै नेपाल विद्यालय कर्मचारी परिषद्को संस्थागत धारणा बाहेकको सहमतिको घोर भत्सर्ना गर्दछौँ,’ विज्ञप्तिमा भनिएको छ ।

त्यस्तै उनीहरुले थप कार्यक्रम समीक्षापश्चात कार्यक्रमहरु सार्वजनिक गर्ने समेत बताएका छन् ।

शिक्षकहरुले आफूहरुसँग सरकारले पटकपटक ऐन ल्याउने भनेर सहमति गरेको तर उक्त सहमति कार्यान्वयनमा आलटाल गरेको भन्दै काठमाडौँ केन्द्रित आन्दोलन गरेका थिए । २० चैतदेखि सुरु भएको आन्दोलन चैत २५ गतेदेखि शैक्षिक हडतालका रुपमा अघि बढेको थियो ।
उनीहरुले आफूले ऐन नपाए पछाडि नहट्ने अडान लिएपछि बुधबार महासंघ र सरकारबिच ९ बुँदे सहमति भएको थियोे । सहमतिपछि शिक्षकहरुले आन्दोलन फिर्ता लिने महासंघले घोषणा गरेको थियो ।