संस्थानका रुपमा रहेका रुग्ण उद्योगहरुलाई नयाँ मोडालिटीमा अघि बढाइने

काठमाडौँ । उद्योग वाणिज्य तथा आपूर्तिमन्त्री दामोदर भण्डारीले आगामी साउन १५ गतेभित्र संस्थानका रुपमा रहेका नेपालका रुग्ण उद्योगहरुलाई नयाँ मोडालिटीका साथ अघि बढाउने बताएका छन् । 

बिहीबार काठमाडौंको भृकुटिमण्डपमा नेपाल अन्तराष्ट्रिय व्यापार मेला उद्घाटन गर्दै मन्त्री भण्डारीले उच्चस्तरीय आर्थिक सुधार आयोगले दिएका सुझावका आधारमा साउन १५ गतेभित्र संस्थानका रुपमा रहेका नेपालका रुग्ण उद्योगहरुको डिडिए पुरा गरेर नयाँ मोडालिटीका साथ अघि बढाउने बताएका हुन् । उनले बिशेष आर्थिक क्षेत्रमा निर्यातका लागि पूर्वाधार बनाउने काम सार्वजनिक निजि साझेदारीबाट अघि बढाइरहेको जानकारी दिए ।

अहिले सरकारले नेपालमा उत्पादन बृद्धि गर्दै निर्यात गर्नका लागि धेरै प्रयासहरु भइरहेको उनले बताए । उनले स्वदेशी बस्तुको उपभोग कार्यविधिलाई अघि बढाइएको भन्दै यसले स्वदेशी बजारीकरणको समस्या समाधान हुने विश्वास व्यक्त गरे । 

मन्त्री भण्डारीले मुलुकमा पुँजीको अभाव नभएपनि लगानी हुन नसक्नु प्रमुख प्रश्नको बिषय भएको उल्लेख गरे । 

नेपाल उद्योग वाणिज्य महासंघको आयोजनामा सुरु व्यापार मेला बैशाख २९ गतेसम्म चल्ने छ । मेलामा कुल ३०० भन्दा बढी स्टल मार्फत मेलामा स्वदेशी एवं विदेशी वस्तु तथा सेवाको प्रर्दशनी रहेको छ । जसमा स्वदेशी हस्तकला उत्पादनहरु, वस्तुगत संघहरुका उत्पादनहरु , साथै चार पांग्रे र दुई पांग्रे विद्युतीय गाडी (इभी) गाडीहरु समेत राखिएको छ । यस वर्षको मेलामा स्वदेशी र विदेशी गरी करिब २० हजार अवलोकनकर्ताहरुले अवलोकन गर्ने अपेक्षा रहेको महासंघले जनाएको छ ।