समाज

सुनसान सडक, भरिभराउ बसपार्क (तस्विरहरु)

सिधाकुरा

सोमबार, जेठ १९, २०८२

काठमाडौँ । राइड सेयरिङ सेवा रोक्नुपर्ने मागसहित सुरु भएको सार्वजनिक यातायात व्यवसायीहरूको आन्दोलनले सोमबार काठमाडौँको जनजीवन प्रभावित बनाएको छ।

सडकहरू सुनसान छन्, तर बसपार्कहरूमा भने सवारीसाधनको भीड लागेको छ। आन्दोलनको घोषणाका कारण काठमाडौँका प्रमुख बसपार्कहरू—गोंगबु, जडिबुटी लगायतमा बस, माइक्रोबस, टेम्पो र ट्रकहरू पार्क गरिएका छन्।

सार्वजनिक यातायात ग्यारेजमै थन्क्याउने निर्णयपछि सबै सवारीसाधनहरू बसपार्क र ग्यारेजतिरै थन्किएपछि ती स्थानहरू अस्वाभाविक रूपमा भरिभराउ भएका हुन्।

गोंगबुस्थित नयाँ बसपार्कमा दैनिक देशभरि छुट्ने लामो दूरीका बसहरू बिहानैदेखि पार्किङमै रोकिएका छन्। त्यतिमात्रै हैनन, उपत्यकामा चल्ने अधिकांश बसहरु पनि त्यहीँ पार्क गरिएका छन् । कतिपय बसमा चालक तथा सहचालकहरू नै बसेर आन्दोलनको समर्थनमा नारा लगाइरहेका छन् ।

बसपार्कभित्र बसको भिड भए पनि यात्रुहरूका लागि भने सेवा ठप्प हुँदा अप्ठ्यारो परेको छ। ‘बस त छन्, तर छुट्दैनन्’, बसपार्कमा भेटिएका एक यात्रुले भने, ‘घर जान भनेर आइएको, तर गाडी नै चलेन।’

व्यवसायीहरू सरकार राइड सेयरिङको नियमन गर्न उदासीन देखिएकाले आफूहरू आन्दोलनमा उत्रिन बाध्य भएको बताएका छन् । उनीहरूको माग सुनुवाई नभएसम्म बसहरू नचलाउने उनीहरुको अडान छ ।