तङ्ग्रिन खोज्दै राजावादीले आगो लगाएको सन्चो कारखाना (तस्बिरहरू)

काठमाडौँ । चैत्र १५ गते काठमाडौँको तीनकुने क्षेत्रमा भएको राजावादीहरूको सभाले हिंसात्मक रूप लिँदा दुई जनाले ज्यान नै गुमाएका थिए भने दर्जनौँ मानिसहरू घाइते भएका थिए । त्यस्तै आन्दोलनकारीहरूले सार्वजनिक तथा निजी संरचनाहरू तोडफोड र आगजनी गरेका थिए। 

Watch On

सोही सभा बिथोलिँदा जडीबुटी उत्पादन तथा प्रशोधन कम्पनी पनि सुरक्षित रहन सकेन। कम्पनीको प्रशासनिक भवन तोडफोड भएको थियो भने उत्पादन तथा प्रयोगशाला भवन आगो लगाएर पूर्ण रूपमा प्रयोगविहीन नै बनाइएको थियो। यस कम्पनीले खेती, प्रशोधन, उत्पादन र बजारीकरणको काम गर्ने भएकाले खेती र प्रशोधन कम्पनीको बाहिरी शाखाहरूले गर्ने र उत्पादित बस्तुको बजारीकरण देखिका कामहरू केन्द्रीय कार्यालयले गर्ने हुँदा सो घटनाको लगभग एक महिना सबै जसो काम ठप्प भयो । 

उक्त कम्पनी पुनः सञ्चालनमा कहिले आउला भन्ने निराशाका बिच घटना भएको एक महिनामै कम्पनीले उत्पादन थालेको छ । यस कार्यका लागि वन तथा वातावरण मन्त्रालयको सहजीकरण र सङ्घीय सचिवालय निर्माण तथा व्यवस्थापन कार्यालयले प्रशासनिक भवनमा सिसा राख्न सहयोग गरेको छ भने उत्पादन भवनको कम क्षति भएको कोठा सफा गरी त्यहीँबाट तत्काल अस्थायी रूपमा उत्पादन सुरु गरिएको छ । 

आगलागी हुनु पहिले मेशिनको प्रयोग गरी उत्पादन गरिने भए पनि मेशिन पूर्ण रूपमा जलेका कारण अहिले सम्पूर्ण काम कर्मचारीले नै गर्नु परेको छ । जसका कारण कम्पनी पूर्ण क्षमतामा चल्न सकेको छैन । 

अहिले ५० देखि ६० प्रतिशत मात्र उत्पादन भइरहेको छ ।