सभामुखले विपक्षीलाई पेलेर अघि बढेपछि राप्रपाले बहिस्कार गर्यो संसद बैठक

काठमाडौँ । राष्ट्रिय प्रजातन्त्र पार्टीले प्रतिनिधि सभाको बैठक बहिस्कार गरेको छ । आइतबार रास्वपा र राप्रपाको प्रदर्शन र विरोधका बिच सभामुखले बैठक पेलेर अघि बढाएपछि राप्रपाले बैठक बहिस्कार गरेको हो । 
आफूहरुको विरोधका बिच सभामुखले आकस्मिक मात्रै नभएर बजेटमाथिको छलफल समेत प्रारम्भ गरेपछि राप्रपाका सांसदले बैठक छोडेर निस्किएका हुन् । रास्वपाले बेल घेराउ गर्दै गर्दा आसनमै उभिएका राप्रपाका सांसद बैठक बहिस्कार गरेका हुन् । 

बैठक सुचारु हुनासाथ राप्रपाका प्रमुख सचेतक ज्ञानेन्द्र शाहीले संसदमा दादागिरी चलेको बताएका थिए। विपक्षी दलका सांसदहरुले संसदमा भिजिट भिसा प्रकरणलाई लिएर नारावाजी गरिरहेको समयमा पेलेर संसद चलाउनु दादागिरी भएको र सो दादागिरी बन्द गर्न उनले आग्रह गरेका थिए । उनले भनेका थिए, ‘संसदमा यसरी आन्दोलन भइरहँदा यसरी संसद चलाउनु के उचित हुन्छ ? उचित हुँदैन भन्ने मलाई लाग्छ र त्यही भएर कुरा केही नराखी, उहाँहरू पनि, हामीहरू पनि जनताले जितेको जनप्रतिनिधि हौँ । भिजिट भिसा प्रकरणमा दोषीलाई कारबाही गर्ने भन्ने मागमा सबैले साथ दिनुहोस्। अरू कुरा केही नगरी यसरी संसद चलाउनु यो चाहिँ संसदीय अभ्यास होइन, यो दादागिरी हो । दादागिरी बन्द गर्नुस्, धन्यवाद।’

आइतबारको संसदमा विपक्षी दल रास्वपा र राप्रपाले भिजिट भिसा प्रकरणलाई लिएर विरोध जनाएका छन् ।