आजको संसद् : रास्वपाको विरोध, राप्रपाको बहिष्कार, सभामुखकाे पेलाई (तस्विरहरु)

काठमाडौँ । सोमबारको प्रतिनिधिसभा बैठक पनि आइतबारकै झैँ गरी अघि बढेको छ । ११ बजे बस्ने भनिएको बैठक ढिला गरि सुरु भए पनि प्रतिपक्ष दल राष्ट्रिय स्वतन्त्र पार्टी र राष्ट्रिय प्रजातन्त्र पार्टीले अवरोध गरेका हुन् । 

आजको बैठक सुरु हुनासाथ सभामुख देवराज घिमिरेले राप्रपा र रास्वपालाई २–२ मिनेटको आकस्मिक समय दिएका थिए । आकस्मिक समयमा बोल्दै राप्रपाका अध्यक्ष राजेन्द्र लिङ्देनले आफूहरूले सरकारलाई जबाफदेही बनाउन खोज्दा सरकारले बेवास्ता गरेको बताएका थिए । सोही कारण विरोधमा उत्रिएका आफूहरूलाई सभामुखले समेत नजरअन्दाज गरेर संसद् बैठक चलाउन नहुने बताएका छन् । संसद्मा सबै दल र सांसदको सम्मान हैसियत हुने बताउँदै उनले सभामुखलाई पेलेर अघि नबढ्न आग्रह गरे । त्यस्तै उनले आफूहरूले संसद् बैठक बहिस्कार गर्ने र बहिस्कार गरेको दिनको भत्ता आफूहरूले नलिने घोषणा गरेका थिए । 

त्यस्तै राष्ट्रिय स्वतन्त्र पार्टीले समेत आफूहरूको अडान कायम राखेको छ । उनीहरूले गृहमन्त्रीमाथि छानबिन गर्नुपर्ने माग राख्दै संसद्मा प्रदर्शन भइरहँदा सभामुखले त्यसलाई पेलेर अघि बढ्नु न्यायोचित नहुने बताए । 

आजको बैठकमा २ विपक्षी दलहरूले संसद्मा अवरोध र बहिस्कार गरेका छन् । रास्वपाका सांसदहरूले विरोध गर्दै बेल घेराउ गरेका छन् भने सभामुखले त्यसलाई पेलेर बजेटमाथिको छलफललाई निरन्तरता दिएका छन् । 

भिजिट भिसा प्रकरणलाई लिएर प्रतिपक्ष दलहरूले जेठ १३ गतेयता संसद् बैठकमा अवरोध गर्दै आइरहेका छन् । सुरुमा गृहमन्त्रीको राजीनामा र छानबिन समिति बनाउनुपर्ने अडान कसेका प्रमुख प्रतिपक्षी दल माओवादी केन्द्र, नेकपा एकीकृत समाजवादीले जेठ ३० गतेदेखि आफ्नो अडानबाट पछि हटे पनि रास्वपा र राप्रपाले भने आफ्नो अडान कायम राखेका छन् ।