त्रिभुवन विश्वविद्यालयको उपकुलपतिमा प्रा.डा. दीपक अर्याल नियुक्त, बालुवाटारमा सपथ ग्रहण

काठमाडौँ । त्रिभुवन विश्वविद्यालयको उपकुलपति पदमा प्रा.डा. दीपक अर्याल नियुक्त भएका छन्। प्रधानमन्त्री एवं विश्वविद्यालयका कुलपति केपी शर्मा ओलीसमक्ष बुधबार बिहान उनले पद तथा गोपनीयताको शपथ लिएका हुन्।

शपथग्रहण कार्यक्रम प्रधानमन्त्री निवास बालुवाटारमा सम्पन्न भएको हो। कार्यक्रममा सहकुलपति तथा शिक्षा, विज्ञान तथा प्रविधिमन्त्री रघुजी पन्तसहित विश्वविद्यालयका अन्य अधिकारीहरू उपस्थित थिए।

शिक्षामन्त्री पन्तको अध्यक्षतामा गठन गरिएको सिफारिस समितिले उपकुलपतिका लागि तीन जनाको नाम सिफारिस गरेको थियो— प्रा.डा. दीपक अर्याल, निमित्त उपकुलपति प्रा.डा. खड्ग केसी र पूर्व डीन प्रा.डा. विनिल अर्याल। सोही सूचीबाट कुलपति ओलीले डा. अर्याललाई उपकुलपतिमा नियुक्त गरेका हुन्।

पूर्व जल तथा मौसम विज्ञान केन्द्रीय विभाग प्रमुखसमेत रहेका अर्याल त्रिभुवन विश्वविद्यालयमा २०५२ सालमा शिक्षण सहायकका रूपमा प्रवेश गरेका थिए। २०५४ मा स्थायी नियुक्ति पाएपछि उनले सहायक प्राध्यापक, उपप्राध्यापक हुँदै २०७६ मा प्राध्यापकको दर्जा प्राप्त गरेका थिए। उनले त्रिविबाट नै जलवायु विज्ञानमा पीएचडी गरेका छन्।

डा. अर्याल नेपाल विज्ञान तथा प्रविधि प्रज्ञा प्रतिष्ठान (नास्ट) का प्राज्ञ पनि हुन्। उनी वरिष्ठ हास्यव्यङ्ग्यकार भैरव अर्यालका जेठा छोरा हुन्।

गत चैत १५ गते तत्कालीन उपकुलपति प्रा.डा. केसरजंग बरालले राजीनामा दिएपछि उपकुलपति पद रिक्त भएको थियो।