मकवानपुरमा १ बर्षमा ४ सय ७ सवारी दुर्घटनामा ५० जनाको ज्यान गयो

 मकवानपुर । मकवानपुर जिल्लामा १२ महिनाको अवधिमा सवारी दुर्घटनामा ५० जनाले ज्यान गुमाएका छन् । जिल्ला प्रहरी कार्यालय मकवानपुरका अनुसार आर्थिक बर्ष २०८१/२०८२ (२०८१ साउन १ गतेदेखि २०८२ असार मसान्तसम्म) को अवधिमा ४ सय ७ वटा सवारी दुर्घटना भएको जनाएको छ । मकवानपुरमा आर्थिक बर्ष २०८०/२०८१ मा भएको सवारी दुर्घटनाको तुलनामा गएको यस आवमा सवारी दुर्घटना झण्डै दोब्बरले बढेको छ । मकवानपुरमा आर्थिक बर्ष २०८०/२०८१ मा २ सय ४५ वटा सवारी दुर्घटना भएको थियो । 

गएको असार मसान्तसम्म भएको सवारी दुर्घटनामा मकवानपुरमा १ सय ६३ जना गम्भीर घाईते भएका छन् भने ८ सय २ जना सामान्य घाईते भएका छन् । यो संख्या २०८०/२०८१ तुलनामा केही थोरै हो ।
जिल्ला ट्राफिक प्रहरी कार्यालय, मकवानपुरले आव २०८१/२०८२ मा सवारी नियम उलङ्घन गर्ने ३० हजार ३४ सवारी कार्वाहीमा २ करोड ४१ लाख ४५ हजार ५४ रुपैया राजश्व सङ्कलन गरेको जनाएको छ । 
ट्राफिकसँग विस्तृत विवरण नै छैन

गत साउन १६ गते सिधाकुराले जिल्ला ट्राफिक प्रहरीसँग सवारी साधनको वर्गीकरणसहितको विवरण सूचनाको हक बमोजिम सूचना माग गरेको थियो । 

ट्राफिक प्रहरीको कार्वाहीमा परेका २ पाङ्ग्रेमा प, ब, फ अल्फाबेट, ३ पाङ्ग्रेमा ह अल्फाबेट, ४ पाङ्ग्रेमा ज, झ, ञ अल्फाबेट, हेभी सवारीमा ख, ग, क अल्फाबेट भएका सवारीहरुको बेग्लाबेग्लै विवरण माग गरिएकोमा यस्ता विवरण आफूहरुसँग नभएको जानकारी दिएको छ । प्रहरी सङ्गठनले उपलब्ध गराएको फम्र्याटमा नै विवरणहरु राख्ने गरेको र सो अनुसार आफूहरुसँग अल्फाबेटिकल वर्गीकरण नहुने जिल्ला ट्राफिक प्रहरी कार्यालयका प्रमुख प्रहरी निरीक्षक बच्चुराम फुयाँलले जनाएका छन् । 

सवारी साधनको अल्फाबेटिकल वर्गीकरण नहुँदा निजी, भाडा वा सरकारी कुन वर्गीकरणका कति सङ्ख्यामा सवारी साधन कार्वाहीमा परे भन्ने विस्तृत विवरण थाहा नहुँदा दुर्घटना न्युनिकरणमा सरकारको आगामी रणनीति बनाउन कठिन हुने देखिएको छ । 

ट्राफिक प्रहरीलाई निजी २ पाङ्ग्रे (प अल्फाबेट) र भाडाका सवारी (कालो प्लेटमा सेतो अक्षर) सवारी साधनलाई बढी दुःख दिने, जरिवाना गर्ने आरोप लाग्ने गरेको छ ।