बैतडी । बैतडीमा एक बालकको शङ्कास्पद मृत्यु प्रकरणमा एमाले प्रदेश मन्त्रीको नाम जोडिए पछि नगद घुस दिएर घटना ढाकछोप गर्न खोजेको फेला परेको छ ।
एमालेकातर्फबाट सुदूरपश्चिम प्रदेश सरकारका भौतिक पूर्वाधार विकास मन्त्री रहेका सुरेन्द्र बहादुर पालको कम्पनीको लापरबाहीले भएको मृत्यु लुकाउन पीडितको खातामा थाहै नदिई ५ लाख रुपैयाँ नगद घुस जम्मा गरिदिएको पनि सिधाकुराले फेला पारेको छ ।
गत साउन १७ गते जिल्लाको चमेलिया नदीमा नुहाउन गएका डिलाशैनी गाउँपालिका ३, गिरिबगडका १४ वर्षीया किरण कोलीको शङ्कास्पद अवस्थामा शव फेला परेको थियो । 
मृतकका परिवार र प्रत्यक्षदर्शीहरुका अनुसार कोलीको मृत्यु करेन्ट लागेर भएको हो । उनी नुहाउन गएको नदी किनारमै अवैध उत्खनन गरी ठुलो पहाड बनाएर थुपारिएको बालुवामा प्रवाह भएको करेन्ट लाग्दा उनको घटनास्थलमै ज्यान गएको हो ।
तर,मृत्यु प्रकरणमा मन्त्रीको नाम जोडिने भएपछि प्रहरीले घटना मुचुल्कामै किर्ते गरेर दुर्घटना भनेर उल्लेख गरेको र जाहेरी लिन नमानेको मृतकका आमा राजमति कोलीको आरोप छ ।
आमा राजमतिकाअनुसार साउन १७ गते शनिवार दिउँसो अत्यधिक गर्मी भएको भन्दै घरबाट छोरा किरण साथीहरूसँग पौडी खेल्न गएको थियो । तर, पौडी खेल्ने क्रममा करेन्ट लागेर उनको मृत्यु भयो । 
‘पौडी खेल्ने क्रममा उनलाई नदीको छेउमा थुपारिएको बालुवामा प्रवाह भएको करेन्ट लागेको हो,’ आमा राजमतिले सिधाकुरासँग भनिन्,‘नदीको छेउमा थुपारिएको बालुवाको ढिस्कोमा प्रवाह भएको करेन्ट लागेर छोराको ज्यान गयो ।’ 
आमाकाअनुसार छोराको मृत्युमा संलग्नलाई कारबाही गर्न प्रशासनसँग हारगुहार माग्दा पनि सहयोग पाइएको छैन । 
छोराको मृत्युको कारण खोज्न प्रहरी र प्रशासनमा धाउँदै गर्दा उल्टै घटना मिलापत्र गर्न भन्दै थाहै नदिई आफ्नो बैङ्क खातामा ५ लाख रुपैयाँ जम्मा गरिदिएको आमा राजमतिले बताइन । कसलाई सोधेर किन पैसा हालिएको हो । यस विषयमा आफूलाई कुनै जानकारी नभएको उनले बताइन । 
घटनाको सत्य तथ्य छानबिन र न्यायका लागि उजुरी दर्ता गर्न सरकारका न्यायिक निकाय धाउन थालेको २१ दिन बितिसकेको आमाको भनाई छ । 
छोराको मृत्युका जिम्मेवारलाई कारबाही गराउन उजुरी बोकेर इलाका प्रहरी कार्यालय पाटन र जिल्ला प्रहरी कार्यालय बैतडी पुगेको तर कुनै पनि निकायमा अहिलेसम्म उजुरी दर्ता नभएको आमाको भनाई छ । 
सरकारी निकायले उजुरी नलिएपछि हुलाक मार्फत आफ्नो उजुरी पठाएको उनले बताइन् । छोराको न्यायका लागि जिल्ला सदरमुकाम पुगेको र न्याय नपाएसम्म सदरमुकामबाट घर नफर्किने निधो आफूहरूले गरेको पनि आमा राजमतिले बताइन् । 
ज्यान मार्ने सम्बन्धी कसुर अन्र्तगत  डिलाशैनी  गाउँपालिका ३ का सुदूरपश्चिम प्रदेशका भौतिक पूर्वाधार विकास मन्त्री समेत रहेका सुरेन्द्र बहादुर पाल, सोही वडाका मुकेश बहादुर पाल र वडा अध्यक्ष रघुवीर बोहराका नाममा किटानी जाहेरी दर्ता गर्न खोजेको परिवारले जनाएको छ । 
अवैध बालुवा उत्खनन् गरी जम्मा गरेकै कारण करेन्ट लागेर कोलीको मृत्यु भएको भन्दै स्थानीयले समेत दोषीमाथि कानुनी कारबाहीको माग गरेका छन् । 
स्थानीय राजनीतिक दलका गाउँपालिका कार्यसमितिले समेत घटनाको सत्य तथ्य छानबिन गरी दोषीमाथि कानुनी कारबाही गर्न प्रेस वक्तव्य नै जारी गरेको छ । स्थानीय युवा जयानन्द जोशीकाअनुसार आफूहरूले कोली परिवारको न्यायका लागि माग गरेपछि पीडकको सत्ता र शक्तिमा पहुँच भएकै कारण कुनै सुनुवाइ भइरहेको छैन । 
उनका अनुसार अहिले सामाजिक सञ्जालमा समेत पीडित परिवारको न्याय र पीडिकलाई कानुनी कारबाहीको माग गर्दै दबाब स्वारुप स्टाट्स लेख्न थालिएको छन् । 
बिहीबार सुदूरपश्चिम प्रदेश सभा सदस्य लक्ष्मी विकले समेत कोली परिवारको न्यायका लागि माग गरेकी छिन् । सामाजिक सञ्जालमा लेख्दै उनले न्यायिक निकायलाई कोली परिवारलाई न्याय दिलाउन माग गरेकी छिन् । 
पीडीत परिवारका सदस्यले सिधाकुरालाई उपलब्ध गराएको विवरणअनुसार घटना छानबिन माग भइरहेको बेला मृतकको आमाको खातामा थाहै नदिई क्षतिपूर्ति भनेर ५ लाख नगद हालिएको थियो । 
जिल्लाकै डिलाशैनी गाउँपालिका ३ का वडा अध्यक्ष रघुवीर बोहराले उक्त रकम पीडितकी आमा राजमतिको खातामा हालेका हुन् । उनी एमालेबाट निर्वाचित वडा अध्यक्ष हुन् । घटना सामसुम पार्न पीडितलाई कुनै जानकारी नदिएरै सुटुक्क रकम खातामा हालिदिएको परिवार र स्थानीयको आरोप छ । तर, वडा अध्यक्ष बोहोराले भने आफूहरूले पीडितहरुलाई सहयोग गरेको दाबी गरेका छन् । 
सिधाकुरासँग घटनाबारे कुरा गर्दै वडा अध्यक्ष बोहोराले पीडित परिवारलाई आर्थिक सहायताका लागि मात्रै यस्तो गरिएको दाबी गरे । 
तर, स्थानीय र पीडित परिवारका सदस्यहरुले आफूहरूले न्यायको माग गरिरहेको बेला गलत नियतका साथ घुस रकम हालिदिएको आरोप लगाएका छन् । 
यता घटना नाम जोडिएका सुदूरपश्चिम प्रदेशका भौतिक पूर्वाधार विकास मन्त्री सुरेन्द्र बहादुर पालले भने घटनाबारे अनविज्ञता प्रकट गरे । 
‘आफूले बैतडीमा पेट्रोल पम्पका लागि आवश्यक संरचना निर्माण गर्न लागेको र त्यसका लागि कामदारले बालुवा जम्मा गरेका होलान्,’ मन्त्री पालले दाबी गरे, ‘तर, कहाँ जम्मा गरेको कति जम्मा गरेको यो विषयमा कामदारलाई नै थाहा होला ।’ 
पीडित परिवार र स्थानीयकाअनुसार घटना लगतै सत्य तथ्य छानबिनको माग गरिए पनि पीडक पक्षले घटना स्थलबाट रातारात उक्त बालुवा हटाएर प्रमाण नष्ट गरेको छ ।
यो प्रकरणमा बुझ्दा जिल्ला प्रहरी कार्यालय बैतडीले भने पीडित परिवार जाहेरीका लागि नआएको बताएको छ । जिल्ला प्रहरी कार्यालय बैतडीका सूचना अधिकारी बलदेव बडुले पीडितहरु सम्पर्कमा नआएको दाबी गरे । ‘उहाँहरू अहिलेसम्म कुनै जाहेरी लिएर आउनुभएको छैन,’ प्रहरी निरीक्षक बडूले भने,‘उहाँहरू आउनु भयो भने हामी हेर्छौँ ।’  

Watch On