प्राइभेट जेटमा पोखरा ओर्लिए बेलायती राजनीतिज्ञ, खर्बपति एवम् ख्यातिप्राप्त परोपकारी लर्ड एशक्रफ्ट

काठमाडौँ । अन्तराष्ट्रिय विमानस्थल सञ्चालन हुन नसकेर चिन्तित पोखराको पर्यटनमा नयाँ आशा पलाएको छ । बिहीबार बिहान पोखरा अन्तराष्ट्रिय विमानस्थलमा एक निजी विमान (प्राइभेट जेट) ल्याण्ड भयो । पोखरा विमानस्थल स्रोतकाअनुसार सो जहाज बेलायतबाट माल्टा र सिंगापुर हुँदै पोखरा अन्तराष्ट्रिय विमानस्थलमा आएर ल्याण्ड भएको थियो । 

सो जहाजका यात्रु थिए बेलायती राजनीतिज्ञ, व्यवसायी एवम् खर्बपति तथा परोपकारी लर्ड एशक्रफ्ट ।  उनी कन्जरभेटिभ पार्टीका पूर्वउपाध्यक्ष तथा कोषाध्यक्षसमेत समेत हुुन् । उनको नाम अन्तर्राष्ट्रिय व्यवसायी, ख्यातिप्राप्त समाजसेवी, लेखक तथा जनमत सर्वेक्षकका रुपमा पनि चर्चित छ । एशक्रफ्ट सवार निजी जहाज बिहिबार पोखरा आएको र  आइतबार गन्तब्यतर्फ फर्कने कार्यसूची रहेको पोखरा विमानस्थल कार्यालय स्रोतले जनाएको छ । 

पोखरा विमानस्थलका महाप्रबन्धक जगन्नाथ निरौलाले सिधाकुरासँग कुरा गर्दै पोखरा विमानस्थलमा निजी जेट विमान बिहीबार बिहान ल्याण्ड भएको बताए ।  जहाजमा को रहेको नखुलेपनि निजी जहाजमा प्रभावशाली व्यक्तिहरु नै आउने र यसले पोखरा विमानस्थल र पर्यटनका लागि नयाँ आशा जगाएको निरौलाको भनाई छ । ‘हिजो बिहान जहाज आएको हो । आइतबारसम्म रहने जानकारी विमानस्थलाई दिइएको छ । जहाजमा को थिए भन्ने हामीलाई जानकारी हुुँदैन,’ महाप्रबन्धक निरौलाले सिधाकुरासँग भने ।

सिधाकुराले विभिन्न स्रोतहरुबाट गरेको खोजीमा सो जहाजमा लर्ड एशक्रफ्ट सवार रहेको फेला परेको थियो । लर्ड एशक्रफ्ट स्वयंले आज बिहान आफ्नो एक्स एकाउण्टमा नेपालबाट शुभप्रभात भन्दै पहाडको छितिजसँग जोडिएको माछापुच्छ्रे हिमालको फोटो समेत  पोष्ट गरेका छन् । लर्ड एशक्रफ्ट सन् २००० मा बेलायतको हाउस अफ लर्डसका आजीवन सदस्य (लाइफ पियर) बनेका थिए । उनले सन् २०१५ मा हाउस अफ लर्डस् राजीनामा दिएर व्यवसाय, लेखन र परोपकारी काममा सक्रिय भूमिका निर्वाह गर्दै आएका छन् । 

सन् २०१२ मा उनी प्रिभी काउन्सिलका सदस्य नियुक्त भएका थिए । यो बेलायती सरकार र सम्राटका लागि उच्चस्तरीय सल्लाह दिने सल्लाहकार समूह हो । राजनीतिक रूपमा उनी कन्जरभेटिभ पार्टीको चुनावी रणनीति, कोष संकलन र लक्षित निर्वाचन क्षेत्रमा प्रभावकारी अभियान सञ्चालनमा महत्वपूर्ण भूमिका खेलेका व्यक्ति मानिन्छन् । 

उनले बेलायती प्रधानमन्त्रीका लागि भूतपूर्व सैनिकहरूको नागरिक जीवनमा पुनःस्थापनासम्बन्धी विशेष प्रतिनिधिका रूपमा पनि काम गरेका थिए । व्यवसायिक क्षेत्रमा लर्ड एशक्रफ्टले सन् १९०७० को दशकदेखि नै अन्तर्राष्ट्रिय पहिचान बनाएका हुन् ।

सुरक्षा सेवा, वित्तीय सेवा, जनशक्ति व्यवस्थापन र प्रविधि क्षेत्रका कम्पनीहरूमा उनको लगानी र नेतृत्व रहेको छ । उनले हाउली ग्रुुपलाई विस्तार गर्दै एडीटी जस्तो ठूलो सुरक्षा कम्पनीलाई अरबौँ डलरमा बिक्री गरेका थिए । हाल उनी वाटरलु इन्भेस्टमेन्ट होल्डिङ्स, इम्पेलाम ग्रुप लगायतका कम्पनीहरूसँग आबद्ध छन्।

लर्ड एशक्रफ्ट जनमत सर्वेक्षणका क्षेत्रमा पनि प्रभावशाली नाम हो । उनले स्थापना गरेको ‘लर्ड एशक्रफ्ट पोल्स’ मार्फत बेलायतसहित विभिन्न देशका चुनाव, मतदाताको धारणा, राजनीतिक नेतृत्व र नीतिगत विषयमा नियमित सर्वेक्षण सार्वजनिक हुँदै आएका छन्।

उनका सर्वेक्षणहरू नीति निर्माण र राजनीतिक विश्लेषणमा व्यापक रूपमा उद्धृत हुने गर्छन्। समाजसेवामा समेत उनको योगदान उल्लेखनीय छ । उनी बेलायतको चर्चित अपराध सूचना संस्था क्राइम स्टपर्सका संस्थापक हुन् । जसले नागरिकलाई अपराधसम्बन्धी सूचना गोप्य रूपमा दिन सक्षम बनाएको मानिन्छ ।

शिक्षा, बालअधिकार, अपराध नियन्त्रण, पूर्व सैनिकको कल्याण तथा वन्यजन्तु संरक्षणका क्षेत्रमा उनले करोडौँ पाउन्ड सहयोग गरेका छन् । एशक्रफ्ट समाज सेवा र दानका लागि प्रख्यात ‘द गिभिङ प्लेज’ मा हस्ताक्षर गर्ने दानी व्यक्तिहरूमध्ये एक हुन्।

सैन्य इतिहासप्रति विशेष रुचि राख्ने लर्ड एशक्रफ्टसँग विश्वकै सबैभन्दा ठूलो भिक्टोरिया क्रस पदक संग्रह रहेको छ ।