रविसंग सुकुम्वासीको गुनासो, ‘हामी अब कहिले सम्म भूमिहिन हुने हो’ ?

काठमाडौँ । हामी अब कहिले सम्म सुकुम्वासी भएर बस्नु पर्ने हो ? शनिवार राष्ट्रिय स्वतन्त्र पार्टीका सभापति तथा चितवन क्षेत्र नम्बर दुईका प्रतिनिधिसभा उम्मेदवार रवि लामिछानेलाई भेट्न पुगेकी एक महिलाले रुँदै गरेको प्रश्न हो यो ।

Watch On

गएका विभिन्न निर्वाचनमा आफूहरूको समस्या समाधान हुने आशा र विश्वास दिलाउँदै जिताएर पठाएका उम्मेदवारले कुनै वास्ता नगरेको उनले बताइन । उनले रुँदै भनिन्, ‘ हामीलाई सुकुम्वासीबाट मुक्त गराइदिनुस् अब यो समस्या झेल्न नसक्ने भइसकेका छौँ, हामी सुकुम्वासी अनेकन् समस्याले ग्रसित छौँ । भोट लैजानुस् र दिन्छौँ पनि तर हाम्रो समस्या समाधान हुनु पर्‍यो ।’

उनको प्रश्नमा रास्वपा सभापति रवि लामिछानेले सुकुम्वासीका नाममा भोट बैङ्क बनाउने काम सदाका लागि अन्त्ये गर्ने बताएका थिए । उनले भने, ‘भोट हाल्नुस् वा नहाल्नुस् । कानुनले दिने कुरामा आफ्नो सरकार यदि आयो भने, कोही कसैले सुकुम्वासी भएर बस्नु पर्दैन ।’

त्यस्तै मत दिने सन्दर्भमा रास्वपा सभापति लामिछानेले भनेका छन्, ‘एक पटक, मात्र एक पटक भोट हामीलाई दिनुस् । यो एक पटक सरकार बनाएर पनि गरेनौँ भने अर्को पटक भोट माग्न आउने छैनौँ ।’

बिहीबार देखि आफ्नो निर्वाचन क्षेत्रमा रहेका रास्वपा सभापति लामिछानेले चितवनको चुनावी माहौल बुझ्ने र मतदाता, पार्टीका शुभेच्छुक, पार्टीका नेता तथा कार्यकर्तासंगको भेटघाटलाई तीव्रता दिइरहेका छन् ।