न्याय पाउने पहिलो हक सहिदकी आमा र घाइतेलाई छः रवि लामिछाने

काठमाडौँ । राष्ट्रिय स्वतन्त्र पार्टी(रास्वपा)का सभापति रवि लामिछानेले न्याय पाउने पहिलो हक जेनजी आन्दोलनका शहीद परिवारलाई रहेको भन्दै पछिल्लो घटनाक्रमलाई राजनीतिक प्रतिशोध भन्न नमिल्ने बताएका छन् । शुक्रबार सिंहदरबारमा सञ्चारकर्मीसंग कुरा गर्दै लामिछानेले यस्तो बताएका हुन् । उनले भने, ‘आफ्नो कलिला बालबालिका गुमाएका आमाहरुलाई न्यायको हतारो छ होला नी ? न्याय पाउने पहिलो हक सहिद परिवारको हो । घइते परिवारको हो । यसको अर्थ अरुलाई पाउनुहुँदैन भन्ने होइन ।’ 

रास्वपा नेतृत्वको सरकारको गतिविधि पब्लिक अडिटमा रहेकाले सवै गतिविधिहरु पारदर्शी हुने उनको भनाइ छ ।  अन्य राजनीतिक दलका नेताप्रति प्रतिशोध साँधिएको हो भन्ने प्रश्नमा लामिछानेले भने, ‘आम नागरिकले त्यसलाई हेरिरहनुभएको छ । हामी पब्लिक अडिटमा छौँ । हाम्रा अभिव्यक्ति, गतिविधि, क्रियाकलाप हाम्रो राजनीतिक अभ्यास, हाम्रा निर्णय सबै आम नागरिकसामु छ । नागरिकले यसलाई हेरिरहनुभएको छ ।’ 

Watch On

त्यस्तै उनले संसदमा लोकतान्त्रिक प्रणालीलाई प्रहार हुने किसिमको व्यवहार नहुने बताएका छन् । संसदमा प्रतिपक्षीलाई दमन गर्ने, नागरिकको मुद्दाहरुलाई बन्देज गर्ने जस्ता लोकतान्त्रिक प्रणालीलाई प्रहार हुने किसिमको व्यवहार नहुने बताएका हुन्  । 

संसदीय मर्यादा, संसदीय नियमावलीका अनुशासनको मापदण्डको पूर्णरुपमा पालना हुने उनको भनाइ छ । उनले रास्वपा उपसभापति डीपी अर्याल सभामुख भइसकेपछि पार्टीभन्दा पनि सदनप्रति उत्तरदायि हुने विश्वास व्यक्त गरे । सभापति लामिछानेले उपसभापतिका विषयमा भने अहिले कुनै पार्टीसंग छलफल नभएको जानकारी दिए । 

उनले रास्वपालाई जनताले दिएको म्याण्डेड अनुसार नीतिगत रुपमा नै बोलेर भन्दा काम गरेर सुधारका अभिभाराहरुलाई पुरा गर्ने धारणा राखे ।