१४ दिनमै किन कारबाहीमा परे श्रममन्त्री साह ?

काठमाडौँ । राष्ट्रिय स्वतन्त्र पार्टी (रास्वपा)ले श्रम, रोजगार तथा सामाजिक सुरक्षा मन्त्री दीपक साहलाई मन्त्री बनेको १४ दिनमै मन्त्रीबाट फिर्ता बोलाउने तयारी गरेको छ । 

चैत १३ गते मन्त्री नियुक्त साह यसबीचमा पटक-पटक विवादमा तानिएका थिए ।

Watch On

उनले स्वास्थ्य बिमा बोर्डमा आफ्नै श्रीमतीको पुनर्बहाली गराउन लबिङ गरेका थिए । यस्तै, बोर्डकै कार्यक्रममा समेत मन्त्री यादवले दिएको अभिव्यक्तिका कारण उनी विवादमा तानिएका थिए ।

रास्वपाका अनुशासन विभागले मन्त्री साहले आचारणविपरीत काम गरेको प्रमाण प्राप्त भएको भन्दै पदबाट फिर्ता गराउन प्रधानमन्त्री बालेन शाहलाई सिफारिस गरेको थियो । 

सरकारको स्पिरिटमा काम गर्न नसकेको भन्दै प्रधानमन्त्रीसमेत मन्त्री साहको गतिविधिबाट सन्तुष्ट नभएको स्रोतले जनाएको छ । 

फागुन २१ गते भएको प्रतिनिधि सभा निर्वाचनमा रास्वपा उम्मेदवार रहेका साह महोत्तरी २ बाट निर्वाचित भएका थिए।

उनले लण्डन स्कुल अफ हाइजिन एण्ड ट्रपिकल मेडिसिनमा ‘पीएचडी स्कलर’, लण्डन स्कुल अफ इकोनोमिक्सबाट हेल्थ पोलिसी र प्लानिङ एण्ड फाइनान्सिङमा स्नातकोत्तर गरेका छन्।

मन्त्री साहले इन्स्टिच्युट अफ मेडिसिनबाट पब्लिक हेल्थमा स्नातकोत्तर तथा अप्टोमेट्रीमा स्नातकोत्तरका साथै नेपाल ल क्याम्पसबाट एलएलबी गरेका छन्। उनी नेपाल दृष्टि विशेषज्ञ संघका अध्यक्षसमेत हुन्।