१४ किलो सुन प्रकरणमा दोषी देखिएकाविरुद्ध मुद्दा दर्ता, एक अर्ब ४० करोड रुपैयाँको बिगो मागदाबी

त्रिभुवन अन्तर्राष्ट्रिय विमानस्थलबाट बरामद भएको १४ किलो सुन प्रकरणमा दोषी देखिएकाविरुद्ध काठमाडौं जिल्ला अदालतमा मुद्दा दर्ता भएको छ।

त्रिभुवन अन्तर्राष्ट्रिय विमानस्थल भन्सार कार्यालयले सोमबार जिल्‍ला अदालत काठमाडौँमा १० जनाविरूद्ध मुद्दा दायर गरेको हो । गत मंसिर २१ गते फ्लाई दुबईबाट काठमाडौँ आएका चन्द्र घलेको साथबाट भन्सार कार्यालयले १४ किलो सुन बरामद गरेको थियो । उक्त प्रकरणमा अनुसन्धानपछि भन्सार कार्यालयले सरकारी वकिल कार्यालयमार्फत १० जनाविरूद्ध मुद्दा दायर गरेको हो ।

उक्त प्रकरणमा प्रमुख भन्सार अधिकृत मणिराम पौडेलको संयोजकत्वमा छानबिन समिति गठन गरिएको थियो । छानबिन समितिले अनुसन्धान गरी पुस ८ गते नै कार्यालयलाई प्रतिवेदन बुझाएको थियो।

भन्सार कार्यालयले सोमबार प्रतिवादी बनाएकामध्ये ८ जना पक्राउ परिसकेका छन् भने २ जनालाई फरार कायम गरी मुद्दा दायर गरिएको छ ।

भन्सार कार्यालयले प्रतिवादी बनाएकाहरुमा मिनबहादुर घले, चन्द्र घले, कृष्णकुमार श्रेष्ठ, डनबहादुर गुरूङ, उनकी श्रीमती बिना गुरूङ, विमानस्थलका प्लम्बर शेरबहादुर बस्नेत, कार्यालय सहयोगी रमेश देउला, लेकबहादुर तामाङ, एयर कन्डिसनर चलाउने र मर्मत गर्ने राधाकृष्ण श्रेष्ठ र अनिल श्रेष्ठ रहेका छन् ।

उनीहरुले पटक पटक गरेको १३८ किलो सुन तस्करीको एक अर्ब ४० करोड रुपैयाँको बिगो मागदाबी गरेको छ। त्यस्तै उनीहरुलाई भन्सार ऐन, २०६४ अनुसार उनीहरूलाई कैद सजाय मागदाबी गरिएको छ।