मौसमविद्को चिन्ता- एलनिनोले तराई सुख्खा बनाउने भयो, पहाडमा भने औसत वर्षा

काठमाडौँ । मौसमविद्ले एलनिनोको प्रभाव नेपालको तराई क्षेत्रमा परेको भन्दै चिन्ता व्यक्त गरेका छन् । 

जल तथा मौसम विज्ञान विभागले मनसुन ऋतुको वर्षा प्रक्षेपण गर्दै यस वर्ष एलनिनोका कारण औसतभन्दा कम पानी पर्ने सम्भावना ६५ प्रतिशतसम्म रहेको बताएको थियो । तर मनसुन सुरु हुने वितिकै पहाडी तथा हिमाली क्षेत्रमा सरदर नै वर्षा भइरहेको छ ।

Watch On

पछिल्लो केही दिन यता मनसुनको न्यून चापीय रेखा सरदरको स्थानभन्दा केही उत्तरतिर सरेकाले नेपाललाई राहत पनि भएको छ । असारको अन्त्यसम्म आइपुग्दा करिब ५० प्रतिशत रोपाइँ सकिसकेको छ । 

मौसमविद् विनोद पोखरेलकाअनुसार आगामी दुई हप्ता पूर्वी तराई बाहेक देशभर उल्लेख्य वर्षा हुने विभिन्न मोडलहरुले देखाएका छन् । तर एलनिनोले तराईमा कम पानी पार्ने देखाएको छ । एलनिनो सक्रिय नहुँदा पनि पछिल्ला केही वर्षमा तराई क्षेत्रमा कम पानी परेको थियो । अघिल्लो वर्ष त वर्षायाममै पानीको संकट चुलिएको थियो । 

यस वर्ष एलनिनोको सिधा प्रभाव तराई तथा मधेशमा देखिन लागेको भन्दै उनले चिन्ता व्यक्त गरेका छन् । उनकाअनुसार पहाडी भेगमा साउन १५ सम्मै औसत वर्षा हुने देखिन्छ । 

के हो एलनिनो?

एलनिनो भनेको प्रशान्त महासागरको मध्य र पूर्वी भूमध्यरेखीय क्षेत्रमा समुद्री सतहको तापक्रम  औसतभन्दा धेरै तातो हुने प्राकृतिक जलवायु प्रक्रिया हो । यसका कारण विश्वभरीको वायुमण्डलीय चक्रलाई प्रभावित तुल्याउँछ । यसकारण कतै खडेरी, कतै वर्षा र बाढी निम्त्याउँछ ।  मौसमविद्हरुले एलनिनोको अवस्थाबाट बाहिर निस्केर लानिनातर्फ बढिरहेको बताए पनि एलनिनोको प्रभाव एसियामा अहिले पनि छ । सामान्यतया एलनिनोको वर्षमा नेपालमा मनसुन केही कमजोर देखिन्छ । वर्षाको प्रणाली पनि केही कमजोर देखिन्छ । नेपालमा यसपटक सरदरभन्दा ६ दिन ढिला मनसुन भित्रिएको थियो ।