प्रस्तावित प्रमुख निर्वाचन आयुक्त कार्कीको सुनुवाइ आज, यस्तो छ उनीविरुद्ध परेको उजुरी

काठमाडौँ । निर्वाचन आयोगमा प्रस्तावित प्रमुख निर्वाचन आयुक्त मानबहादुर कार्कीको आज संसदीय सुनुवाइ हुँदैछ । सुनुवाइका लागि संसदीय सुनुवाइ समितिको बैठक विहान ११:१५ बजे सिंहदरबारमा बस्दैछ । समितिले सुरुमा उजुरीकर्तासँग छलफल गर्दैछ । 

पाल्पा तानसेन नगरपालिका– ९ का भेषराज लुइँटेलले कार्कीलाई प्रमुख निर्वाचन आयुक्तमा अनुमोदन नगर्न, सिफारिस अस्वीकृत गर्न तथा विस्तृत छानबिन गर्न माग गर्दै उजुरी दर्ता गराएका हुन् । फिफा विश्वकप फुटबलको प्रत्यक्ष प्रसारणमा अनाधिकृतरुपमा चर्को शुल्क लिएर नेपालीलाई ठगी गरेको विषयमा सर्वोच्च अदालतमा रिट दर्ता गराउन खोज्ने रजिष्टार पदमा रहेका कार्कीले अस्वभाविक रुपमा नियमविपरित रोकेको र यसमा ठगी गर्नेहरुसँग उनको मिलेमतो हुनसक्ने भन्दै छानबिन गर्नुपर्ने माग उजुरीमा गरिएको छ । उजुरी प्रधानमन्त्री कार्यालय तथा अख्तियार दुरुपयोग अनुसन्धान आयोगमा पनि दिइएको छ । 

Watch On

समिति सभापति बोधनारायण श्रेष्ठले सुरुमा उजुरीकर्तासँग उजुरीको विषयमा छलफल गरिने र त्यसपछि प्रस्तावित व्यक्तिको सुनुवाइ गरिने बताए । 

समितिले मङ्गलबार आयुक्तमा प्रस्तावित गुरुप्रसाद वाग्ले र डा राजीव सुब्बालाई आमन्त्रण गरी सुनुवाइ गरेको थियो । दुबैले आफ्नो कार्ययोजना प्रस्तुत गरेका थिए । दुबैविरुद्ध कुनै उजुरी परेको थिएन । 

प्रमुख आयुक्तको सुनुवाइ सकिएपछि समितिले अनुमोदन गर्ने वा नगर्ने भनेर निर्णय सुनाउनेछ ।