काठमाडौँको होस्टलमा छोराको हत्या, सहन नसकेर गाउँमा आमा बितिन्

काठमाडौँ । काठमाडौँको होस्टलमा छोराको हत्या भएको खबर सुनेर गाउँमा आमाले पनि मृत्यु रोजेकी छिन् । छोराको हत्याको खबरले विक्षिप्त बनेकी आमाले पीडा सहन नसकेर  प्राण त्यागेकी हुन् । 

जिल्ला प्रहरी परिसरका काठमाडौँअनुसार दाङ घोराही उपमहानगरपालिका १७ निवासी २२ वर्षीय बसन्त कालाथोकीको शुक्रबार विहान काठमाडौँ–१० शंखमूलस्थित भ्याली ब्वाइज होस्टलभित्र धारिलो हतियार प्रहार गरेर हत्या गरिएको थियो । होस्टलमा धारिलो हतियार प्रहारबाट गम्भीर घाइते कालाखेतीलाई उपचारका लागि सिभिल अस्पताल पुर्याउँदा चिकित्सकले मृत घोषणा गरेका थिए ।

Watch On

परिवारका जेठा छोरा बसन्तको हत्याको खबर सुनेर उनकी आमा ३८ वर्षीय बिना कालाथोकीले पनि मृत्यु रोजेकी हुन् । जिल्ला प्रहरी कार्यालय दाङका प्रहरी प्रवक्ता डा. हेमबहादुर केसीकाअनुसार छोराको हत्याको खबर सुनेर आमाले आत्महत्या गरेकी हुन् । 'छोराको खबर सुनेर उहाँंले पनि ह्याङगिङ सुसाइड गर्नुभयो । बाबुको बुवालाई इनफर्म गरिएको छ । बाहिरबाट आइसकेपछि थप प्रक्रिया अघि बढ्छ,' उनले भने । 

डिएसपी केसीकाअनुसार बसन्तका बुवा रोमहर्श कालाथोकी मलेसियाबाट सोमबार फर्किँदैछन् । 

प्रहरीकाअनुसार बसन्त काठमाडौँको होस्टलमा बसेर वैदेशिक रोजगारीमा जानका लागि तयारी गरिरहेका थिए । उनलाई होस्टलमै बस्ने  बारा कलैया–३ का २० वर्षीय प्रमित पटेल र १८ वर्षीय शेखर यादवले आक्रमण गरेका थिए । कुटपिट तथा धारिलो हतियार प्रहार गरी हत्या गरेको आरोपमा दुबै जनालाई प्रहरीले पक्राउ गरेर अनुसन्धान गरिरहेको छ ।