कर्णालीमा चाडपर्व सुरक्षाका लागि ५ हजार ३१४ प्रहरी परिचालन गरिने

कर्णाली । दसैँ, तिहार, नेपाल संवत् र छठपर्वलाई लक्षित गर्दै कर्णाली प्रदेशमा पाँच हजार ३१४ प्रहरी परिचालन गरिने भएको छ।

Watch On

कर्णालीका १० वटै जिल्लामा चाडपर्वका बेला हुन सक्ने सुरक्षा चुनौती र सम्भावित जोखिमलाई ध्यानमा राखेर प्रदेश प्रहरीले विशेष सुरक्षा योजना तयार पारेको हो। उक्त योजना असोज २५ देखि कात्तिक ३० गतेसम्म लागू हुनेछ।

कर्णाली प्रदेश प्रहरी कार्यालय सुर्खेतका प्रमुख प्रहरी नायब महानिरीक्षक जयराज सापकोटाका अनुसार सुरक्षा योजना कार्यान्वयनका लागि प्रदेश प्रहरी र मातहतका कार्यालयबाट प्रहरी परिचालन गरिनेछ।

योजनाअनुसार २८ स्थानमा मोबाइल गस्ती, ९८ स्थानमा मोटरसाइकल गस्ती, ६० द्रुत प्रतिकार्य टोली र १४८ स्थानमा पैदल गस्ती परिचालन गरिनेछ। त्यस्तै, लामो तथा छोटो दूरीका २०४ गस्ती सञ्चालन हुनेछन्।

सुरक्षाका लागि ६७ स्थानमा विशेष, नियमित तथा आकस्मिक जाँच र ४७ स्थानमा ट्राफिकसहितको संयुक्त जाँच गरिनेछ। महत्त्वपूर्ण प्रतिष्ठान, धार्मिक तथा पर्यटकीयस्थलको सुरक्षामा ३८ स्थानमा प्रहरी खटाइनेछ भने यात्रु तथा नागरिकको सहयोगका लागि ३७ स्थानमा सहायता कक्ष स्थापना गरिनेछ।

यसैगरी, बैंक तथा वित्तीय संस्था, सुरक्षा र बजार अनुगमनका लागि ३१ स्थानमा प्रहरी परिचालन हुनेछ। विशिष्ट व्यक्तिको सुरक्षाका लागि १०, माइकिङ तथा प्रचारप्रसारका लागि ३४ र अन्य जिम्मेवारीका लागि ४९४ स्थानमा प्रहरी खटाइने सापकोटाले बताए।

कालोबजारी र सवारी दुर्घटना नियन्त्रणमा जोड

चाडपर्वका बेला हुन सक्ने अवाञ्छित गतिविधि तथा आपराधिक घटना रोकथाम र नियन्त्रण गरी नागरिकलाई सुरक्षित वातावरणमा चाडपर्व मनाउने व्यवस्था मिलाउनु सुरक्षा योजनाको मुख्य उद्देश्य रहेको प्रहरीले जनाएको छ।

सार्वजनिकस्थल तथा मेलापर्वमा हुन सक्ने झैझगडा र हुलदङ्गा नियन्त्रण गर्नुका साथै बजारमा कृत्रिम अभाव सिर्जना गर्ने, कालोबजारी गर्ने, अस्वाभाविक मूल्यवृद्धि गर्ने र ठगी गर्ने गतिविधिमाथि निगरानी बढाइनेछ।

त्यस्तै, चाडपर्वका बेला सवारीसाधनको चाप बढ्ने भएकाले ट्राफिक व्यवस्थापनमा समेत विशेष ध्यान दिइने प्रहरीले जनाएको छ। सवारी दुर्घटना न्यूनीकरण गरी नागरिकको आवागमन सुरक्षित बनाउने लक्ष्यसहित गस्ती, जाँच र निगरानीलाई प्रभावकारी बनाइनेछ।