मतदान ढिलो भएकामा माफी माग्दै गगन थापाले भने: पार्टीमा कुनै गुट छैन, भ्रममा नपरी आफ्नो विवेकले भोट हाल्नुस्

काठमाडौँ । नेपाली कांग्रेसका सभापति गगनकुमार थापाले १५औँ महाधिवेशनअन्तर्गत केन्द्रीय कार्यसमितिको निर्वाचनमा आफ्नो नाम जोडेर प्रचार गरिएका उम्मेदवारका सूचीहरू आधिकारिक नभएको स्पष्ट पारेका छन् ।

Watch On

उनले सम्पूर्ण महाधिवेशन प्रतिनिधिहरूलाई कुनै पनि भ्रम वा प्रभावमा नपरी स्वतन्त्र विवेक प्रयोग गरेर मतदान गर्न आग्रह गरेका छन् ।

सामाजिक सञ्जालमार्फत आफ्नो धारणा सार्वजनिक गर्दै नेता थापाले प्राविधिक कारणले तोकिएको समयभन्दा एक दिन ढिलो गरी मतदान सुरु भएकोमा प्रतिनिधिहरूमा पर्न गएको असुविधाप्रति क्षमासमेत मागेका छन् । उनले यस महत्त्वपूर्ण लोकतान्त्रिक अभ्यासमा मर्यादित, संयमित र उत्साहपूर्ण ढङ्गले सहभागी हुन आह्वान गरेका छन् । 

विभिन्न उम्मेदवारहरूको सूचीलाई आफ्नो नामसँग जोडेर प्रचारप्रसार भइरहेकोप्रति ध्यानाकर्षण गराउँदै थापाले भनेका छन्, 'यो पार्टीभित्रको स्वस्थ आन्तरिक लोकतान्त्रिक प्रक्रिया हो। यसपटक कुनै पनि प्यानल वा गुट छैन। मेरो नाम जोडेर प्रचार गरिएका कुनै पनि उम्मेदवारका सूचीलाई मेरो आधिकारिक समर्थन वा सिफारिसका रूपमा नबुझिदिनुहोला।'

कुनै पनि अफवाहको पछाडि नलाग्न आग्रह गर्दै उनले पार्टीको सर्वोपरि हितलाई ध्यानमा राखेर आफ्नै मूल्याङ्कन र विश्वासका आधारमा मतदान गर्न अपिल गरेका छन् । महाधिवेशन प्रतिनिधिहरूको विवेकपूर्ण निर्णयले नै कांग्रेस सङ्गठनलाई नयाँ उचाइमा पुर्‍याउने विश्वाससमेत थापाले व्यक्त गरेका छन् ।