२१ किलो सुनसहित पक्राउ परेका तीन चिनियाँ सार्वजनिक

काठमाडौं । काठमाडौंको बूढानीलकण्ठस्थित एक घरबाट प्रहरीले २१ किलो ७५० ग्राम सुन बरामद गरेको छ। सुन प्रशोधन गर्ने ठाउँका रूपमा प्रयोग गरिएको घरबाट तीन चिनियाँ नागरिक पक्राउ परेका छन्।

Watch On

काठमाडौं उपत्यका अपराध अनुसन्धान कार्यालयले शुक्रबार पत्रकार सम्मेलन गरी पक्राउ पर्नेमा २७ वर्षीय हान फेइ, ३७ वर्षीय वाङ जियानझेन र ४७ वर्षीय झोउ लोङक्विन रहेको जानकारी दिएको हो।

प्रहरीले उनीहरूले भाडामा लिएको घरमा छापा मारेर ठोस र अर्धठोस अवस्थामा रहेको सुन बरामद गरेको जनाएको छ। सुन गाल्न तथा प्रशोधन गर्न प्रयोग गरिने मेसिन र अन्य उपकरणसमेत घरबाट फेला परेका छन्।

प्रहरीका अनुसार बरामद सुनमध्ये ११ वटा टुक्रामा रहेको १० किलो ९९७ ग्राम सुन तयारी अवस्थामा थियो। त्यस्तै, प्लास्टिकमा राखिएको १० किलो ७५२ ग्राम अर्धठोस सुन बरामद भएको छ। दुवै गरी कुल २१ किलो ७५० ग्राम सुन बरामद गरिएको प्रहरीले जनाएको छ।

१० दिनसम्म निगरानी गरेर छापा

सुन तस्करीमा संलग्न व्यक्ति र त्यससँग जोडिएको सञ्जाल पत्ता लगाउने उद्देश्यले प्रहरीले उक्त घर तथा त्यहाँ आउनेजाने व्यक्तिमाथि निगरानी गरेको थियो।

विशेष सूचना पाएपछि काठमाडौं उपत्यका अपराध अनुसन्धान कार्यालयबाट खटिएको टोलीले करिब १० दिनसम्म सूक्ष्म निगरानी गरी बिहीबार घरमा छापा मारेको थियो। त्यसक्रममा तीन चिनियाँ नागरिक पक्राउ परेका हुन्।

प्रहरीको प्रारम्भिक अनुसन्धानअनुसार उनीहरूले भाडामा लिएको घरलाई सुन प्रशोधन गर्ने ठाउँका रूपमा प्रयोग गर्दै आएका थिए। सुनको स्रोत, नेपाल भित्र्याउने माध्यम र यस कारोबारमा संलग्न अन्य व्यक्तिबारे प्रहरीले अनुसन्धान गरिरहेको छ।

विमानस्थल हुँदै बाहिरिएको आशंका

अनुसन्धानमा संलग्न प्रहरी अधिकारीहरूले बरामद सुन त्रिभुवन अन्तर्राष्ट्रिय विमानस्थल हुँदै नेपाल भित्रिएको हुन सक्ने प्रारम्भिक आशंका गरेका छन्। सुन प्रशोधन गरेर ढिक्का बनाई भारततर्फ तस्करी गर्ने गरिएको हुन सक्ने आशंकामा समेत अनुसन्धान भइरहेको छ।

तर, बरामद सुन कहाँबाट ल्याइएको थियो, त्यसको वास्तविक मालिक को हो र यसको अन्तिम गन्तव्य कहाँ थियो भन्ने विषय खुलिसकेको छैन। पक्राउ परेका तीनै जनासँग सोधपुछ भइरहेको प्रहरीले जनाएको छ।

नेपालमा यसअघि पनि विमानस्थल र स्थल नाकाबाट ठूलो परिमाणमा सुन तस्करीका घटना सार्वजनिक भएका छन्। २०८० साउनमा त्रिभुवन अन्तर्राष्ट्रिय विमानस्थलबाट ब्रेक सुमा लुकाएर ल्याइएको करिब ६० किलो सुन बरामद भएको थियो।