एमालेमा रिक्त पदको मनोनयनमा जुटेन सहमति, शनिबार पनि बैठक

काठमाडौं । नेकपा एमालेको स्थायी कमिटी बैठकमा पार्टीका रिक्त पदमा मनोनयन गर्ने विषयमा सहमति जुट्न सकेन। विभिन्न पदमा मनोनयनका लागि नेताहरूका नाममा छलफल भए पनि निष्कर्षमा पुग्न नसकेपछि बैठक शनिबार पनि बस्ने भएको छ।

Watch On

शुक्रबार पार्टी केन्द्रीय कार्यालय च्यासलमा बसेको बैठकमा केन्द्रीय कमिटीमा रिक्त रहेका सदस्य, पोलिटब्युरो सदस्य तथा स्थायी कमिटीमा रिक्त पदमा मनोनयन गर्ने विषयमा छलफल भएको थियो।

बैठकपछि एमाले सचिव पद्मा अर्यालले रिक्त पदमा मनोनयन गर्ने विषयमा स्थायी कमिटी सदस्यहरूले आ–आफ्ना सुझाव प्रस्तुत गरेको जानकारी दिइन्। विभिन्न नाममा छलफल भए पनि सहमति जुट्न नसकेको उनले बताइन्।

बैठकमा एमालेकी वरिष्ठ नेता विद्यादेवी भण्डारीले ११ वर्षपछि आफू पुनः सक्रिय पार्टी जीवनमा फर्किएको प्रसंग पनि उठाएकी थिइन्।

सचिव अर्यालका अनुसार भण्डारीले मुलुकमा लोकतन्त्र र संविधानमाथि देखिएका चुनौतीको रक्षा गर्नु लोकतन्त्र स्थापनाका लागि संघर्ष गरेका राजनीतिक दलहरूको मुख्य दायित्व भएको धारणा राखेकी थिइन्।

विगतका आन्दोलनमा आफू स्वयं सहभागी भएको स्मरण गर्दै भण्डारीले लोकतन्त्र र गणतन्त्रलाई थप सुदृढ बनाउन तथा पार्टीमा आबद्ध भएर योगदान पुर्‍याउने उद्देश्यले सक्रिय राजनीतिमा फर्किएको बताएकी थिइन्।

रिक्त पदमा मनोनयन र पार्टीको आन्तरिक जिम्मेवारी बाँडफाँटबारे छलफललाई निरन्तरता दिन एमाले स्थायी कमिटीको बैठक शनिबार पुनः बस्नेछ।