नेकपाले कात्तिक ७ देखि दुईमहिने राष्ट्रिय जागरण अभियान चलाउने

काठमाडौं । नेपाली कम्युनिष्ट पार्टी (नेकपा) ले कात्तिक ७ गतेदेखि दुईमहिने राष्ट्रिय जागरण अभियान सञ्चालन गर्ने भएको छ। पार्टीको महाधिवेशन तथा स्थानीय र प्रदेश निर्वाचनको तयारीसँगै सरकारका जनविरोधी र अराजक क्रियाकलापविरुद्ध आन्दोलनको तयारी गर्ने उद्देश्यले अभियान सञ्चालन गर्न लागिएको हो।

Watch On

शुक्रबार पार्टी कार्यालय पेरिसडाँडामा बसेको केन्द्रीय संयोजन समितिको बैठकले कात्तिक ७ देखि मंसिर २५ गतेसम्म अभियान सञ्चालन गर्ने कार्यविधि पारित गरेको छ।

बैठकपछि पार्टी प्रवक्ता प्रकाश ज्वालाले महाधिवेशनको तयारी, स्थानीय तथा प्रदेश निर्वाचनको तयारी र सरकारका गतिविधिविरुद्ध आन्दोलनको तयारीलाई अभियानले प्राथमिकता दिने जानकारी दिए।

बैठकले पार्टीका वडा, पालिका, जिल्ला, प्रदेश र राष्ट्रिय महाधिवेशनको कार्यतालिकासमेत तय गरेको छ। जसअनुसार पुस ११ गते देशभरका सबै वडामा एकैदिन अधिवेशन गरिनेछ भने माघ १५ गते सबै पालिकामा पालिकास्तरीय अधिवेशन आयोजना गरिनेछ।

स्थानीय तहको निर्वाचनलगत्तै जिल्ला, प्रदेश र राष्ट्रिय महाधिवेशन आयोजना गरिने प्रवक्ता ज्वालाले बताए।

त्यस्तै, ‘ग्रे जोन’ पत्रिकाको रिपोर्टमा उल्लेखित राष्ट्रिय स्वाधीनतासँग जोडिएको विषयमा सरकारले आफ्नो आधिकारिक धारणा सार्वजनिक गर्नुपर्ने मागसहित बैठकले विशेष प्रस्ताव पारित गरेको उनले बताए।

युवा सहभागिता ५० प्रतिशत पुर्‍याउने

नेकपाले पार्टीका कार्यक्रमहरूमा युवा सहभागिता ५० प्रतिशत सुनिश्चित गर्ने निर्णय गरेको छ। युवा क्षेत्रको कामलाई प्राथमिकता दिँदै पार्टीका गतिविधिमा युवाको सहभागिता बढाउने निर्णय गरिएको प्रवक्ता ज्वालाले बताए।

बैठकले प्रवासमा रहेका नेपाली, श्रमजीवी मजदुर र किसानबीचको पार्टी कामलाई थप सशक्त र व्यवस्थित बनाउने निर्णयसमेत गरेको छ।

राष्ट्रिय जागरण अभियानमार्फत पार्टीको संगठन विस्तार, महाधिवेशनको तयारी र आगामी निर्वाचनका लागि राजनीतिक आधार तयार पार्ने नेकपाको योजना छ।