राष्ट्रपतिबाट विपद्सम्बन्धी अध्यादेश जारी, भूमिसम्बन्धी र वनसम्बन्धी अध्यादेश अध्ययनमै

काठमाडौं  । राष्ट्रपति रामचन्द्र पौडेलले विपद्सम्बन्धी केही नेपाल ऐनलाई संशोधन गर्ने अध्यादेश, २०८३ जारी गरेका छन्। सरकारले सिफारिस गरेका तीन अध्यादेशमध्ये राष्ट्रपतिले एउटा मात्रै जारी गरेका हुन्।

Watch On

राष्ट्रपति कार्यालयका प्रवक्ता कृष्णबहादुर शाहीका अनुसार विपद्सम्बन्धी अध्यादेश जारी भएको हो। भूमिसम्बन्धी र वनसम्बन्धी अध्यादेश भने अध्ययनकै क्रममा रहेको राष्ट्रपति कार्यालय स्रोतले जनाएको छ।

सरकारले भूमिसम्बन्धी केही नेपाल ऐनलाई संशोधन गर्ने अध्यादेश र वनसम्बन्धी केही नेपाल ऐनलाई संशोधन गर्ने अध्यादेश पनि जारी गर्न राष्ट्रपतिसमक्ष सिफारिस गरेको थियो।

भोटेकोशी बाढीलगायत विपद्का घटनालाई मध्यनजर गर्दै विपद्सम्बन्धी कानुन संशोधन गर्न अध्यादेश ल्याइएको हो।

हाल प्रचलित व्यवस्थाअनुसार १२ वर्षदेखि बेपत्ता भएका व्यक्तिलाई मृतक घोषणा गर्न सकिने व्यवस्था छ। विपद्का घटनामा बेपत्ता भएका व्यक्तिको हकमा यो अवधि घटाएर ४५ दिनमै मृतक घोषणा गर्न सकिने व्यवस्था अध्यादेशमा समेटिएको जनाइएको छ।

त्यस्तै, भूमिसम्बन्धी केही नेपाल ऐन संशोधन गर्न सरकारले छुट्टै अध्यादेश सिफारिस गरेको थियो। उक्त अध्यादेशमा भूमिहीन दलित, सुकुम्बासी र अव्यवस्थित बसोबासीलाई जग्गा उपलब्ध गराउने विषय समावेश छ।

भूमिसम्बन्धी र वनसम्बन्धी अध्यादेश राष्ट्रपतिबाट जारी भएपछि मात्रै ती अध्यादेशमा प्रस्तावित व्यवस्था कार्यान्वयनमा आउनेछन्।