पानामामा ७.७ म्याग्निच्युडको भूकम्प, भाैतिक स‌रचनामा ठुलाे क्षति

काठमाडौँ। मध्य अमेरिकी देश पानामामा शुक्रबार गएको ७.७ म्याग्निच्युडको शक्तिशाली भूकम्पले विभिन्न क्षेत्रमा क्षति पुर्‍याएको छ । राजधानी पानामा सिटीसहित देशका विभिन्न भागमा धक्का महसुस गरिएको छ ।

Watch On

अमेरिकी भूगर्भ सर्वेक्षण (यूएसजीएस) का अनुसार भूकम्पको केन्द्रबिन्दु हेर्रेरा प्रान्तको पितालोसा अरिबा क्षेत्र नजिक थियो । भूकम्पपछि दर्जनौँ परकम्पसमेत गएका छन् ।

भूकम्पबाट सबैभन्दा बढी प्रभावित क्षेत्रहरूमा हेर्रेरा, कोक्ले र लस सान्तोस प्रान्त रहेका छन्। कोक्ले प्रान्तको पेनोनोमेमा होटल डोस कोन्टिनेन्टेसको एक भाग, सान जुआन बाउटिस्टा क्याथेड्रलको टावर र गभर्नर कार्यालयको केही भाग भत्किएको छ । प्लाया भेनाओ क्षेत्रमा पनि भवन भत्किँदा पार्किङमा राखिएका गाडीमा क्षति पुगेको छ ।

हेर्रेरा प्रान्तको टोनोसी र लस मिनास क्षेत्रमा घरहरूमा क्षति पुगेको छ भने लस सान्तोस प्रान्तका केही तटीय क्षेत्रमा पनि असर परेको छ । देशका विभिन्न स्थानमा सडक, चर्च, सरकारी भवन तथा खानेपानी प्रशोधन केन्द्रमा क्षति पुगेको अधिकारीहरूले बताएका छन् ।

राजधानी पानामा सिटीमा भवनहरू खाली गराइएको थियो भने मेट्रोका दुई लाइनको सेवा अस्थायी रूपमा रोकिएको थियो । टोचुमेन अन्तर्राष्ट्रिय विमानस्थलको सेवा पनि केही समय प्रभावित भएको थियो ।

भूकम्पपछि केही व्यक्ति घाइते भएका विवरण सार्वजनिक भए पनि प्रारम्भिक सरकारी विवरणमा मानवीय क्षतिको पुष्टि भएको छैन । पानामा नहर भने नियमित सञ्चालनमा रहेको अधिकारीहरूले जनाएका छन् ।