भारतमा ‘कक्रोच जनता पार्टी’को प्रदर्शन अघि युट्युबर ध्रुव राठी पक्राउ

काठमाडौं । भारतमा ‘कक्रोच जनता पार्टी’को प्रदर्शनको आह्वान भइरहेका बेला चर्चित युट्युबर ध्रुव राठीलाई प्रहरीले शनिबार बिहान नियन्त्रणमा लिएको छ।

Watch On

बीबीसी हिन्दीका अनुसार,  ध्रुव राठीका एक निकटवर्ती व्यक्ति र गुरुग्राम प्रहरीले उनको हिरासतबारे पुष्टि गरेका छन्। राठीका निकटवर्तीका अनुसार उनलाई गुरुग्रामको सेक्टर–५६ बाट नियन्त्रणमा लिइएको हो।

यसअघि शुक्रबार साँझ राठीले सामाजिक सञ्जालमा एउटा भिडियो पोस्ट गरेका थिए। भिडियोमा उनी भारतको राजधानी नयाँदिल्लीस्थित इन्डिया गेटअगाडि घुमिरहेको देखिएका थिए।

भिडियोमा उनले आफू दिल्ली आइपुगेको बताउँदै प्रधानमन्त्री नरेन्द्र मोदीको सरकारमाथि प्रश्न उठाएका थिए। उनले प्रदर्शनलाई लक्षित गर्दै सरकारले ५० भन्दा बढी मेट्रो स्टेसन बन्द गरेको तथा कैयौँ रेल र बस सेवा रद्द गरेको दाबी गरेका थिए।

‘प्रदर्शनका कारण दिल्लीलाई लकडाउनमा राख्न खोजिँदै छ,’ उनले भिडियोमा भनेका थिए।

राठीले अगाडि भनेका थिए, ‘मोदीजीले के गरिरहनुभएको छ, मैले बुझ्न सकेको छैन। एकातिर तपाईंको आईटी सेलले हाम्रो प्रदर्शनमा कोही पनि सहभागी हुँदैन भनिरहेको छ। यदि भीड आउँदैन भने यी सबै किन गरिँदै छ? मलाई त लाग्छ, तपाईं डराउनुभएको छ। वास्तवमा जनता जागिसकेका छन्।’

यसैबीच, प्रदर्शनमा सहभागी हुन दिल्ली पुगिरहेका र भेला भइरहेका अन्य प्रदर्शनकारीलाई पनि दिल्ली प्रहरीले नियन्त्रणमा लिएको बीबीसी हिन्दीले जनाएको छ।