योगेश भट्टराईले दिए ओलीलाई तीनबुँदे सुझाव

काठमाडौँ । नेकपा एमालेका उपमहासचिव योगेश भट्टराईले पार्टीमा ४० वर्षमुनिका युवालाई प्राथमिकता दिन र आन्तरिक एकता कायम राख्न अध्यक्ष केपी शर्मा ओलीलाई तीनबुँदे सुझाव दिएका छन् । 

Watch On

स्थायी कमिटीको जारी बैठकमा आफू उपस्थित हुन नसकेको जानकारी दिँदै भट्टराईले केन्द्रीय सदस्य मनोनयन, स्थायी कमिटी र पोलिटब्युरो गठन गर्दा नयाँ र पुरानाबीच सन्तुलन मिलाउन आग्रह गरेका हुन्।

उनले पार्टी अध्यक्ष ओलीलाई सम्बोधन गर्दै दिएको सुझावमा बाँकी केन्द्रीय सदस्य मनोनयन गर्दा ४० वर्षमुनिका युवालाई विशेष स्थान दिनुपर्ने, विगतमा छुटेका भूगोल र समुदायलाई समेट्दै आन्तरिक सन्तुलन कायम गर्नुपर्ने उल्लेख छ।

त्यस्तै, स्थायी कमिटी र पोलिटब्युरो गठन गर्दा पुराना र नयाँ नेताबीच सन्तुलन मिलाउन उनले आग्रह गरेका छन्। 

उनले आसन्न निर्वाचनलगायत चुनौती सामना गर्न पार्टीको आन्तरिक एकता पहिलो सर्त भएको उल्लेख गर्दै एकतालाई खण्डित गर्ने निर्णय नगर्न पनि सचेत गराएका छन्। केन्द्रीय सदस्य मनोनयन तथा स्थायी कमिटी र पोलिटब्युरो गठनका विषयमा सहमति जुट्न नसके ती एजेन्डा केन्द्रीय कमिटीको आगामी बैठकबाट टुंग्याउनु उपयुक्त हुने उनको सुझाव छ।

असोजको पहिलो साता सम्पन्न केन्द्रीय कमिटी बैठकमा पनि ४० वर्षमुनिका युवालाई प्राथमिकता दिने तथा स्थायी कमिटी र पोलिटब्युरो गठन गर्दा नयाँ र पुरानाबीच सन्तुलन मिलाउने विषय उठाएको उनले स्मरण गराएका छन्।

पार्टीको जारी स्थायी कमिटी बैठकले राष्ट्रिय भेला बोलाउने तथा वडा र पालिका अधिवेशन आयोजना गर्ने निर्णय गरेको सन्दर्भमा उनले संगठनात्मक प्रक्रियामार्फत पार्टीलाई गतिशील बनाउँदै आन्तरिक र राष्ट्रिय महत्त्वका विषयमा सकारात्मक निष्कर्षमा पुग्नुपर्ने बताएका छन्।