पानी परेको छैन, बुढीगण्डकीमा कसरी आयो लेदोसहितको बाढी?

काठमाडौं। उत्तरी गोरखामा ठूलो पानी परेको छैन। तर आइतबार बिहानै बुढीगण्डकीमा लेदोसहितको भेलबाढी आयो। बाढीले तटीय क्षेत्रमा विनाश गर्नेक्रम जारी छ। प्रशासनले त्रिशूली नदी किनारसम्मै सतर्कता अपनाउन भनेको छ।

Watch On

बुढीगण्डकीको बाढीले पैयू र बगर गाउँका ३५ घर बगाएको चुमनुब्री गाउँपालिकाकी उपाध्यक्ष लक्ष्मी गुरुङले जानकारी दिइन्।

उनका अनुसार बाढीले दोभान, घट्टेखोला, जगत् र सल्लेरी गाउँमा व्यापक क्षति पुर्‍याएको छ।   

आज बिहान ४ः०० बजे ती गाउँमा बाढी पसेपछि नदी स्थानीय सुरक्षित स्थानतर्फ भागेको उनले बताइन्।

मौसम पूर्वानुमान महाशाखाले अद्यावधिक गरेको विवरणअनुसार उत्तरी गोरखाका तीन केन्द्रमा वर्षा भएको देखिँदैन। सामागाउँ केन्द्रमा छिटपुट वर्षा भएको छ। त्यहाँ पछिल्लो २४ घण्टामा शून्य मिलिमिटर वर्षात भएको रेकर्ड छ। नम्रुङ क्षेत्रमा पछिल्लो २४ घण्टामा ०.२ मिलिमिटर मात्रै पानी परेको छ। सेतिबास जगतमा पनि शून्य मिलिमिटर नै वर्षा भएको छ।

यसबारे हामीले बाढी पूर्वानुमान महाशाखाका प्रमुख विनोद पराजुलीलाई सोध्यौं। उनले सुख्खा पहिराको आशंका गरे।

पहिरो झरेर नदी थुनिएको हुनसक्ने र खोलिँदा भेलबाढीको रुप लिएको हुनसक्ने आशंका छ। गोरखाका सहायक प्रमुख जिल्ला अधिकारी नेत्रप्रसाद शर्माले पनि बुढीगण्डकी नदीको सहायक स्यार खोलामा पहिरो गएर बहाव थुनिएको हुनसक्ने आशंका भएको बताएका थिए।

‘हामीले गाउँपालिका अध्यक्ष, त्यहाँका सुरक्षा निकायसँग बुझेर विवरण अद्यावधिक गर्दैछौं,’ पराजुलीले भने।