बुढीगण्डकीमा बाढी : सल्लेरी बजार बगायो, सोती र दोभानका पुल पनि बगे

गोरखा । गोरखाको बुढीगण्डकी नदीमा आएको ठूलो बाढीले चुमनुब्री गाउँपालिकाको सल्लेरी बजार बगाएको छ। बाढीले सोती बजारको पुल र केही टहरा तथा धार्चे गाउँपालिकाको दोभानस्थित बेलिब्रिजसमेत बगाएको छ। विभिन्न क्षेत्रमा घर तथा अन्य संरचनामा क्षति पुगेको छ।

Watch On

चुमनुब्री गाउँपालिका भएर बग्ने बुढीगण्डकी नदीमा आएको बाढी आइतबार बिहान ७ः३० बजे सोती बजार पुगेको थियो। बाढीले सोती बजारको पुल र केही टहरा बगाएको प्रमुख जिल्ला अधिकारी धर्मेन्द्रकुमार मिश्रले जानकारी दिए।

धार्चे गाउँपालिका उपाध्यक्ष सुनिला गुरुङका अनुसार बाढीले दोभानको पुल, केरौंजा जाने पुल र केही बस्तीका घरसमेत बगाएको छ।

बाढीले गोरखाका विभिन्न क्षेत्रमा क्षति पुर्‍याएपछि उद्धारका लागि हेलिकोप्टर परिचालन गरिएको छ।

चुमनुब्री गाउँपालिकास्थित छेकम्पारमा सुक्खा पहिरो खसेर नदी थुनिएपछि बाढी आएको हुन सक्ने आशंका गरिएको छ। त्यस्तै, चुम्चेतको स्यारखोलामा आएको भेलबाढीका कारण पनि बुढीगण्डकीको जलसतह बढेको सूचना प्राप्त भएको गोरखाका सहायक प्रमुख जिल्ला अधिकारी नेत्रप्रसाद शर्माले बताएका छन्।

नदीमा एक्कासि पानीको बहाव बढेपछि तल्लो तटीय क्षेत्रका बासिन्दालाई सुरक्षित र अग्लो स्थानमा जान आग्रह गरिएको छ। सल्लेरी, जगत, दोभान, तातोपानी, खोर्लाबेँसी, माछाखोला, सोती, आर्खेत र आरुघाटलगायत नदी आसपासका बस्तीमा सतर्कता अपनाउन भनिएको छ।

बाढीको वास्तविक कारण, मानवीय क्षति र अन्य भौतिक क्षतिको पूर्ण विवरण आउन बाँकी छ।