समाज

बूढीगण्डकीमा बाढी खतरा तहभन्दा माथि, बेनीघाटसम्म अति उच्च जोखिम

सिधाकुरा

आइतबार, असोज २५, २०८३

बूढीगण्डकीमा बाढी खतरा तहभन्दा माथि, बेनीघाटसम्म अति उच्च जोखिम

काठमाडौं । बूढीगण्डकी नदीमा जलसतह खतरा तहभन्दा माथि रहेकाले त्रिशूली नदीको तटीय क्षेत्रमा बाढीको जोखिम बढेको छ।

Watch On

बाढी पूर्वानुमान महाशाखाले आइतबार बिहान ९ः२५ बजे सूचना जारी गर्दै बूढीगण्डकीमा जलसतह बढ्ने र घट्ने क्रम जारी रहेकाले तल्लो तटीय क्षेत्रका बासिन्दालाई सतर्क रहन आग्रह गरेको छ।

महाशाखाका अनुसार त्रिशूली नदीको बेनीघाटसम्मको क्षेत्रमा अति उच्च जोखिम छ। उक्त क्षेत्रका बासिन्दालाई तत्काल सुरक्षित उच्च स्थानमा जान आग्रह गरिएको छ।

त्यस्तै, मुग्लिनसम्मको क्षेत्रमा उच्च जोखिम रहेकाले उच्च सतर्कतामा बस्न भनिएको छ। चितवन र नवलपरासीका नदी आसपासका क्षेत्रमा मध्यम जोखिम रहेकाले सतर्क रहन महाशाखाले अनुरोध गरेको छ।

बाढीसम्बन्धी थप जानकारीका लागि नेपाल बाढी सूचना फेसबुक पेज वा ११५५ को विकल्प २ मा सम्पर्क गर्न सकिने महाशाखाले जनाएको छ।

गोरखाको चुमनुब्री गाउँपालिका क्षेत्रमा आइतबार बिहान आएको बूढीगण्डकीको भीषण बाढीले घर, बजार, पुल तथा जलविद्युत् आयोजनाका संरचनामा क्षति पुर्‍याएको छ। नदी थुनिएर एक्कासि खुलेपछि आएको बाढीका कारण तल्लो तटीय क्षेत्रमा समेत जोखिम बढेको छ।

प्रकाशित मिति: आइतबार, असोज २५, २०८३

प्रतिक्रिया दिनुहोस्