कांग्रेसमा उपसभापति र महामन्त्रीको मतगणना : खुलातर्फ भण्डारी र पौडेल अगाडि

काठमाडौं। नेपाली कांग्रेसको १५औँ महाधिवेशनबाट नयाँ नेतृत्व चयनका लागि भइरहेको मतगणनामा उपसभापति र महामन्त्रीका उम्मेदवारबीच प्रतिस्पर्धा रोचक बनेको छ। पछिल्लो मतपरिणाममा उपसभापतिको खुलातर्फ डा. चन्द्रकान्त भण्डारी र महामन्त्रीको खुलातर्फ प्रदीप पौडेलले अग्रता लिएका छन्।

Watch On

उपसभापतिका चार पदमध्ये खुलातर्फ दुई पदका लागि भइरहेको प्रतिस्पर्धामा भण्डारीले ६७९ मत पाएका छन्। उनीपछि मधु आचार्यले ३९३, गोविन्द भट्टराईले ३४५ र सुरेन्द्रराज पाण्डेले ३३७ मत पाएका छन्। दीपक गिरीले २६४, धनराज गुरुङले २४० र चन्द्रमोहन यादवले १३८ मत पाएका छन्।

उपसभापतिको समावेशी एक पदमा विनोदकुमार चौधरीले ३८२ मतसहित अग्रता लिएका छन्। जीवन परियारले ३३०, फरमुल्लाह मंसुरले १९०, सीता गुरुङले १७० र रञ्जित कर्णले १०७ मत पाएका छन्।

महामन्त्रीका तीन पदमध्ये खुलातर्फ दुई पदका लागि भइरहेको प्रतिस्पर्धामा प्रदीप पौडेल ७८८ मतसहित अगाडि छन्। अमरसिंह पुन मगरले ४७८ र उदयशमशेर राणाले ४५६ मत पाएका छन्। डा. सुनिलकुमार शर्माले ३२५, गुरुराज घिमिरेले १९७, नैनसिंह महरले १४८, शंकर तिवारीले २० र डा. सन्तोष उपाध्यायले १८ मत पाएका छन्।

महामन्त्रीको महिला एक पदमा डा. डिला संग्रौला (पन्त) ले ५८३ मत पाएकी छन्। उनलाई महालक्ष्मी उपाध्याय (डिना) ले ५५७ मतसहित पछ्याइरहेकी छन्। रीता खनालले १५३ मत पाएकी छन्।

पछिल्लो मतपरिणामअनुसार केही पदमा प्रतिस्पर्धा कडा देखिएको छ। मतगणना जारी रहेकाले अन्तिम नतिजा आउँदासम्म उम्मेदवारहरूको स्थानमा फेरबदल हुन सक्नेछ।