समाज

बूढीगण्डकी बाढी प्रभावितको उद्धार र पुनर्स्थापनाका लागि राप्रपाको माग

सिधाकुरा

आइतबार, असोज २५, २०८३

बूढीगण्डकी बाढी प्रभावितको उद्धार र पुनर्स्थापनाका लागि राप्रपाको माग

काठमाडौं। राष्ट्रिय प्रजातन्त्र पार्टी (राप्रपा) ले गोरखाको चुमनुब्री गाउँपालिकामा स्यार खोला थुनिएर आएको बाढीले पुर्‍याएको क्षतिप्रति दुःख व्यक्त गर्दै प्रभावितको उद्धार, राहत र पुनर्स्थापनामा तत्काल जुट्न सरकारसँग माग गरेको छ।

Watch On

राप्रपा अध्यक्ष राजेन्द्र लिङ्देनले आइतबार प्रेस विज्ञप्ति जारी गर्दै बाढीले पक्की तथा झोलुङ्गे पुल, भौतिक संरचना र बस्तीमा क्षति पुर्‍याएको भन्दै दुःख व्यक्त गरेका हुन्।

उनले विपद् प्रभावित नागरिकको उद्धार, घाइतेको उपचार र बेपत्ताको खोजी कार्य प्रभावकारी बनाउन सरकारसँग माग गरेका छन्। प्रभावित परिवारलाई तत्काल राहत, सुरक्षित आवास र खाद्यान्नको व्यवस्था गर्न तथा जोखिममा रहेका नागरिकको सुरक्षामा विशेष ध्यान दिन पनि उनले आग्रह गरेका छन्।

क्षतिग्रस्त संरचनाको पुनर्निर्माण र विस्थापित परिवारको पुनर्स्थापनाका लागि सरकारले अविलम्ब आवश्यक कदम चाल्नुपर्ने लिङ्देनको माग छ।

उनले प्रभावित नागरिकप्रति सहानुभूति व्यक्त गर्दै राप्रपा उनीहरूको साथमा रहेको बताएका छन्। साथै, नदी तटीय क्षेत्रमा बसोबास गर्ने नागरिकलाई उच्च सतर्कता अपनाउन अपिल गरेका छन्।

प्रकाशित मिति: आइतबार, असोज २५, २०८३

प्रतिक्रिया दिनुहोस्