समस्याग्रस्त सहकारीका बचतकर्तालाई विवरण अद्यावधिक गर्न आग्रह

काठमाडौं । समस्याग्रस्त सहकारी व्यवस्थापन समितिको कार्यालयले सम्बन्धित सहकारीका बचतकर्तालाई आफ्नो मागदाबीको विवरण अद्यावधिक गर्न आग्रह गरेको छ।

Watch On

समितिले बचतकर्ताको रकम फिर्ता गर्ने प्रक्रिया व्यवस्थित बनाउन अनलाइन प्रणालीमार्फत मागदाबीको विवरण संकलन तथा अद्यावधिक गरिरहेको जनाएको छ। अनलाइन प्रणालीमा पेस गरिएको मागदाबीबापतको रकम राष्ट्रिय भुक्तानी गेटवेबाट सम्बन्धित बचतकर्ताको बैंक खातामा सिधै भुक्तानी हुने व्यवस्था गरिएको समितिले जनाएको छ।

समितिका अनुसार बचतकर्ताले मागदाबीमा उल्लेख गरेको विवरण परिवर्तन वा अद्यावधिक गर्न सक्नेछन्। त्यसका लागि प्रत्येक मागदाबीमा एउटा मात्र मोबाइल नम्बर प्रयोग गर्नुपर्नेछ। उक्त नम्बरमा प्राप्त हुने ओटीपीका आधारमा विवरण संशोधन गर्न सकिने व्यवस्था गरिएको छ।

मागदाबीमा नाम गलत भएको, मोबाइल नम्बर अपुष्ट रहेको, परिचय तथा बचत पुष्टि हुने प्रमाण संकलन नभएको वा एउटै बचतकर्ताले एकभन्दा बढी मागदाबी पेस गरेको अवस्थामा आवश्यक प्रमाणसहित विवरण अद्यावधिक गर्नुपर्नेछ।

त्यस्तै, एउटै मोबाइल नम्बर प्रयोग गरेर एकभन्दा बढी मागदाबी पेस गरिएको अवस्थामा प्रत्येक मागदाबीमा फरक मोबाइल नम्बर राख्नुपर्ने भएमा आवश्यक विवरणसहित समितिको इमेलमा निवेदन दिनुपर्ने सूचनामा उल्लेख छ।

समितिले विवरण अद्यावधिक र मोबाइल नम्बर संशोधनसम्बन्धी यो व्यवस्था पहिलोपटकका लागि २०८३ साल कात्तिक मसान्तसम्म लागू हुने जनाएको छ। समितिले सम्बन्धित सबै बचतकर्तालाई उक्त समयसीमाभित्र आवश्यक विवरण अद्यावधिक गर्न आग्रह गरेको छ।