क्यानडामा जातीय विभेद अन्त्य गर्न सहयात्राद्वारा राष्ट्रसंघमा ज्ञापनपत्र

टोरन्टो । क्यानडामा जात तथा वंशका आधारमा हुने विभेदलाई समकालीन जातीय भेदभाव र संरचनात्मक असमानताको रूपमा स्पष्ट मान्यता दिन माग गरिएको छ । 

Watch On

सामाजिक न्यायका लागि अन्तर्राष्ट्रिय सञ्जाल ('सहयात्रा) ले संयुक्त राष्ट्रसङ्घीय मानव अधिकार परिषद्की समकालीन जातीय भेदभाव, विदेशीप्रति घृणा र असहिष्णुता विषयक विशेष प्रतिवेदनकर्ता अश्विनी के.पी. समक्ष ज्ञापनपत्र बुझाएको हो । 

समकालीन जातीयता, जातीय भेदभाव, विदेशीप्रति घृणा र सम्बन्धित असहिष्णुता ज्ञापनपत्रमा विषय समेटिएको सहयात्राले जनाएको छ । 

बेलायती कोलम्बियाको मानव अधिकार ट्रिब्युनलले कार्यस्थलमा हुने जातीय गालीगलौजबारे गरेको निर्णय र अन्टारियो मानव अधिकार आयोगको निर्देशिकालाई उद्धृत गर्दै डायस्पोरा समुदायको दैनिक जीवन, रोजगारी, शिक्षा र सामाजिक सम्बन्धमा जातीय विभेदको प्रभाव कायमै रहेको उल्लेख गरेको छ।

संस्थाले संयुक्त राष्ट्रसङ्घ र क्यानडा सरकारलाई क्यानडामा जात तथा वंशमा आधारित भेदभावलाई समकालीन जातीय भेदभाव र संरचनात्मक असमानताको रूपमा स्पष्ट रूपमा सम्बोधन गर्न आग्रह गरेको छ । 

सञ्जालका सभापति डा. द्रोण प्रकाश रसाली र अध्यक्ष सन्तोष विश्वकर्माद्वारा हस्ताक्षरित ज्ञापनपत्रमा क्यानडाको विद्यमान मानव अधिकार संरचनामा जातीय विभेदसम्बन्धी रहेको ‘ब्लाइन्ड स्पट’ सम्बोधन गर्न आग्रह गरिएको छ ।