कसैको दबाब र प्रभावमा नपरी काम गर्न प्रहरीलाई प्रधानमन्त्रीको निर्देशन

काठमाडौँ । प्रधानमन्त्री बालेन शाहले कुनै पनि किसिमको दबाब र प्रभावमा नपरी संविधान र प्रचलित कानुनअनुसार निष्पक्ष रूपमा जिम्मेवारी निर्वाह गर्न प्रहरीलाई निर्देशन दिएका छन्।

Watch On

प्रहरी निरीक्षक आधारभूत तालिम (१–१८४औँ समूह) को दीक्षान्त समारोहलाई सम्बोधन गर्दै प्रधानमन्त्री शाहले प्रहरी सेवामा नैतिकता, निष्ठा, इमानदारी र अनुशासनलाई पेशागत सफलताको मुख्य आधारका रूपमा लिनुपर्ने बताएका हुन्।

१६ महिने आधारभूत तालिम पूरा गरी कार्यक्षेत्रमा प्रवेश गर्न लागेका प्रहरी निरीक्षकहरूलाई बधाई दिँदै प्रधानमन्त्री शाहले तालिमबाट हासिल गरेको ज्ञान र सीपलाई व्यवहारमा उतार्न आग्रह गरे। उनले प्रहरी अधिकारीहरूलाई संविधान, कानुन, नियम तथा कार्यविधिको पूर्ण पालना गर्दै आफ्नो जिम्मेवारीप्रति जवाफदेही हुनुपर्नेमा जोड दिए।

प्रधानमन्त्री शाहले शान्ति सुरक्षा कायम गर्ने, अपराध अनुसन्धान गर्ने तथा संकटका बेला नागरिकको जिउधनको रक्षा गर्ने महत्वपूर्ण जिम्मेवारी नेपाल प्रहरीको रहेको उल्लेख गरे। प्रहरी अधिकारीहरूले कुनै पनि अनुचित प्रभावमा नपरी भेदभावरहित रूपमा कर्तव्य निर्वाह गर्नुपर्ने उनको भनाइ थियो।

उनले प्रहरीको काम नागरिकले प्रत्यक्ष रूपमा अनुभूत गर्न सक्ने हुनुपर्ने बताउँदै संगठनको प्रोटोकलविपरीत व्यक्तिगत स्वार्थका गतिविधिमा संलग्न नहुन पनि प्रहरी निरीक्षकहरूलाई सचेत गराए।

त्यस्तै, बदलिँदो समयसँगै अपराधका स्वरूप र प्रवृत्तिमा परिवर्तन भइरहेको उल्लेख गर्दै प्रधानमन्त्री शाहले अपराध अनुसन्धानलाई निष्पक्ष, तथ्यपरक, वैज्ञानिक र प्रमाणमुखी बनाउन सूचना प्रविधिको उचित प्रयोग आवश्यक रहेको बताए।

यसका लागि प्रहरी संगठन, नेतृत्व र प्रशिक्षकहरूको महत्वपूर्ण भूमिका रहने उल्लेख गर्दै उनले प्रभावकारी अनुसन्धानका लागि आवश्यक स्रोतसाधन उपलब्ध गराउन सरकार प्रतिबद्ध रहेको बताए।