सरुवामा चलखेल गरेपछि मन्त्रालय तानिए नापीका डिजी

काठमाडौं । नापी विभागका महानिर्देशक प्रकाश जोशीको सरुवा भएको छ। भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलको मन्त्रीस्तरीय निर्णयका आधारमा उनको सरुवा गरिएको बताइएको छ।

Watch On

जोशीलाई मन्त्रालयको अतिरिक्त समूहमा सरुवा गरिएको छ। उनको ठाउँमा विभागकै उपमहानिर्देशक करुणा केसीलाई जिम्मेवारी दिइएको मन्त्रालय स्रोतले बताएको छ।

महानिर्देशक जोशीमाथि विभागभित्रको सरुवामा चलखेल गरेको आरोप लागेको थियो। मुगुमा चार वर्षदेखि काम गर्दै आएका भीमबहादुर डाँगीलाई फेरि दुर्गममै राखिएको भन्दै उनले सार्वजनिक रूपमै असन्तुष्टि जनाएका थिए। 

यसैबीच, नापी विभागले सरुवासम्बन्धी गुनासो पेस गर्न कर्मचारीहरूलाई आग्रह गरेको छ। विभागले असोज २६ गते जारी गरेको सूचनामा असोज २३ गतेको निर्णयअनुसार विभाग तथा अन्तर्गतका कार्यालयमा कार्यरत नेपाल इन्जिनियरिङ सेवा, सर्भे समूहका कर्मचारीहरूको सरुवा गरिएको उल्लेख छ।

उक्त सरुवाका सम्बन्धमा निजामती सेवा ऐन, २०४९, निजामती सेवा नियमावली, २०५० तथा प्रचलित स्वीकृत मापदण्डबमोजिम कुनै गुनासो भए स्पष्ट तथ्य, आधार र कारण खुलाएर असोज ३० गतेभित्र पेस गर्न विभागले अनुरोध गरेको छ।

तोकिएको समयसीमाभित्र प्राप्त गुनासोमाथि प्रचलित कानुनी व्यवस्था तथा स्वीकृत मापदण्डबमोजिम आवश्यक कारबाही गरिने विभागले जनाएको छ।