सीमापारि जाने उपभोक्ता घट्दै, नेपालगञ्जमा बढ्यो चहलपहल

राँझा (बाँके) । नेपालगञ्जस्थित जमुनाह नाकामा कडाइ गरिएपछि यसपटक दसैंको किनमेलका लागि सीमापारिको भारतीय बजार रुपैडिहा जाने नेपाली उपभोक्ताको सङ्ख्या घटेको छ । त्यसको प्रभाव रुपैडिहा बजारको चहलपहलमा देखिएको छ भने नेपालगञ्जका सपिङ मलमा उपभोक्ताको आकर्षण बढेको छ ।

Watch On

दसैं र तिहारजस्ता ठूला पर्व नजिकिँदै गर्दा विगतका वर्षमा बाँकेको सीमावर्ती भारतीय बजार रुपैडिहामा नेपाली उपभोक्ताको घुइँचो लाग्ने गर्थ्यो । नयाँ लुगा र घरायसी उपभोग्य सामग्री किन्न जमुनाह नाका हुँदै दैनिक ठूलो सङ्ख्यामा नेपाली सीमापारि जाने गर्थे । तर, यसपटक रुपैडिहा बजारमा विगतको जस्तो रौनक देखिएको छैन ।

नेपालगञ्ज उद्योग वाणिज्य सङ्घका पूर्वअध्यक्ष कृष्णप्रसाद श्रेष्ठका अनुसार सीमा नाकामा गरिएको कडाइ र भन्सारसम्बन्धी नयाँ व्यवस्थाका कारण रुपैडिहा जाने नेपाली उपभोक्ताको सङ्ख्या घटेको हो ।

गत वैशाखदेखि नेपालगञ्ज भन्सार नाकाबाट १०० रुपैयाँभन्दा बढी मूल्यका सामान बिनाभन्सार नेपाल ल्याउन रोक लगाइएको थियो । उक्त सीमा बढाएर हाल ५०० रुपैयाँ पुर्‍याइएको छ ।

चाडपर्वका बेला नेपाली ग्राहकले भरिभराउ हुने रुपैडिहाका पसल यसपटक तुलनात्मक रूपमा सुनसान छन् । दुवैतर्फ जाँच गराउनुपर्ने र लामो समय लाइनमा बस्नुपर्ने भएकाले सीमापारि जाने उपभोक्ता घटेको नेपालगञ्ज–२१ पुरैनाकी सिर्जना थापाले बताइन् ।

५०० रुपैयाँभन्दा बढी मूल्यका सामान ल्याउँदा भन्सार जाँच गराउनुपर्ने व्यवस्थाका कारण नेपाली उपभोक्ता रुपैडिहा जान कम गरेको उनको भनाइ छ ।

सीमापारि जाने उपभोक्ताको सङ्ख्या घटेसँगै नेपालगञ्जका सपिङ मल तथा सुपरस्टोरमा चहलपहल बढेको छ । नेपालगञ्जस्थित भाटभटेनी, वेस्टर्न मार्टलगायत सुपरस्टोरमा नेपाली उपभोक्ताको आकर्षण बढेको उपभोक्ता अधिकारकर्मी प्रभातकुमार ठकुरीले बताए ।

उनले भन्सारमा गरिएको कडाइका कारण सीमापारि जान रोकिएका उपभोक्तालाई नेपालगञ्जमै किनमेल गर्ने वातावरण बनाउन स्थानीय व्यापारी र उद्योग वाणिज्य सङ्घले पहल गर्नुपर्ने बताए । चाडपर्वका बेला नेपाली बजारमा मूल्यवृद्धि गर्ने र वस्तुको कृत्रिम अभाव सिर्जना गर्ने प्रवृत्तिलाई निरुत्साहित गर्न बजार अनुगमनमा समेत ध्यान दिनुपर्ने उनको सुझाव छ ।

यद्यपि, रुपैडिहा जाने उपभोक्ताको सङ्ख्या घटे पनि नेपालगञ्जको स्थानीय बजारमा किनमेल सोही अनुपातमा नबढेको नेपालगञ्ज उद्योग वाणिज्य सङ्घका अध्यक्ष चिरञ्जीवी ओलीले बताए ।

उनका अनुसार सीमा नाकामा कडाइ गरिएपछि विगतको तुलनामा तस्करी घटेको अनुमान छ । यद्यपि, मुख्य नाकामा निगरानी बढाइए पनि खुला सीमाका कारण भित्री नाकाबाट तस्करी हुन सक्ने भएकाले ती क्षेत्रमा समेत निगरानी बढाउनुपर्ने देखिएको उनले बताए ।