आज कहाँ कहाँको सडक अवरुद्ध छ ? (सूचीसहित)

काठमाडौँ । पछिल्लो समय परेको अविरल वर्षाका कारण देशका विभिन्न मुख्य राजमार्ग तथा सडक खण्डहरू बाढी र पहिरोबाट प्रभावित भएका छन्। नेपाल प्रहरीले सार्वजनिक गरेको पछिल्लो विवरण अनुसार बागमती र गण्डकी प्रदेशका महत्वपूर्ण राजमार्गहरू अवरुद्ध हुन पुगेका हुन्।   

Watch On

बागमती प्रदेशको धादिङस्थित त्रिभुवन राजपथ अन्तर्गत धुनिवेशी नगरपालिका–०९ खत्रीपौवामा गत असोज २१ गते राति ९:५० बजे पहिरो खसेपछि बाटो अवरुद्ध भएको थियो। हाल सो क्षेत्रमा पहिरो हटाई यातायात एकतर्फी रूपमा सुचारु गराइएको छ।

त्यस्तै, गण्डकी प्रदेशका विभिन्न जिल्लाहरूमा पनि बाढी तथा पहिरोले सडक यातायातमा ठूलो असर पुर्याएको छ। 

गोरखामा सडक पूर्ण अवरुद्ध छ ।  आरुघाट गाउँपालिका–२, ३ र धार्चे गाउँपालिका–९ स्थित नयाँपुल क्षेत्रमा असोज २५ गते बिहान आएको बाढीका कारण सोतिमा रहेको फलामे पुलका साथै गोरखा–आरुघाट हुँदै धादिङ जोड्ने सडक पूर्ण रूपमा अवरुद्ध भएको छ। हालसम्म सो सडक खण्ड खुलाउन सकिएको छैन।    

नवलपरासी पूर्वको कालीगण्डकी करिडोर अन्तर्गत बौदिकाली गाउँपालिका–०३ स्थित जन्ती पहिरोमा असोज १४ गते खसेको पहिरोका कारण बाटो प्रभावित भएको छ। सो स्थानमा हाल एकतर्फी रूपमा मात्र सवारी सञ्चालन भइरहेका छन् भने साना गाडी मात्र चल्न सक्ने र ठूला गाडीहरू आवतजावत गर्न नसक्ने प्रहरीले जनाएको छ।   

म्याग्दीको बेनी–जोमसोम सडक खण्ड अन्तर्गत रघुगंगा गाउँपालिका–०२ बैसरीमा असोज १० गते खसेको पहिरो पन्छाएर बाटो एकतर्फी सुचारु राखिएको छ।   

मनाङको असोज १८ गते आएको बाढीका कारण बेशीसहर हुँदै खाङसारतर्फ जाने सडक अवरुद्ध भएकोमा हाल सो क्षेत्रमा पनि एकतर्फी यातायात सञ्चालनमा ल्याइएको छ।   

लगातारको मौसम परिवर्तन र जोखिमलाई ध्यानमा राख्दै सम्बन्धित सडक खण्डको ताजा स्थिति बुझेर मात्र यात्रा तय गर्न नेपाल प्रहरीले सबै सर्वसाधारणलाई आग्रह गरेको छ। अवरुद्ध सडकहरू पूर्ण रूपमा सञ्चालनमा ल्याउन प्राविधिक टोली तथा सुरक्षा निकाय खटिरहेको जनाइएको छ।