ब्रेकिङ ब्याडका अभिनेता आरजे मिट्टेको ३४ वर्षको उमेरमा निधन, शोकमा डुब्यो हलिउड

टेक्सस । बहुचर्चित हलिउड ड्रामा सिरिज 'ब्रेकिङ ब्याड'मा वाल्टर ह्वाइट जुनियरको भूमिकाबाट घर-घरमा परिचित अमेरिकी अभिनेता तथा अपाङ्गता अधिकारका मुखर समर्थक आरजे मिट्टेको ३४ वर्षको उमेरमा निधन भएको छ।

Watch On

मिट्टेका प्रतिनिधिले बीबीसीलाई दिएको जानकारी अनुसार उनको निधन टेक्ससको ब्राउनस्वाइभिलमा भएको हो। क्यामरून काउन्टीकी पीस जज सिंडी हिनोजोसाले समाचार संस्था एपीलाई पुष्टि गरेअनुसार अक्टोबर १२ का दिन उनलाई आफ्नै घरमा मृत घोषित गरिएको थियो। ब्राउनस्वाइभिल प्रहरी विभागले घटनाको पुष्टि गर्दै हालसम्म मृत्युको यकिन कारण खुल्न नसकेको र यस विषयमा अनुसन्धान जारी रहेको बताएको छ। यद्यपि, प्रहरीले घटनामा कुनै पनि किसिमको शङ्कास्पद वा आपराधिक गतिविधिको आशङ्का नरहेको जनाएको छ र सत्यथार्थ पत्ता लगाउन शवको पोस्टमार्टम गरिने भएको छ।

लुइसियाना अमेरिकामा हुर्किएका मिट्टे सन् २००५ मा अभिनय क्षेत्रमा लाग्न आफ्नी बहिनीसँगै लस एन्जलस सरेका थिए। अमेरिकी केबल ब्रोडकास्टर एएमसीमा २००८ देखि २०१३ सम्म प्रसारित र २१ औँ शताब्दीको उत्कृष्ट टिभी सिरिजमध्ये एक मानिने 'ब्रेकिंग ब्याड' मा उनले मुख्य पात्र वाल्टर ह्वाइट (ब्रायन क्रान्स्टन) का विद्रोही छोरा वाल्ट जुनियरको भूमिका निर्वाह गरेका थिए।

वास्तविक जीवनमा सेरेब्रल पाल्सीबाट पीडित मिट्टेले यस सिरिजमा आफ्नो स्वास्थ्य अवस्थाको अनुभवलाई समेत जोड्दै अत्यन्त सहज र इमानदार अभिनय प्रस्तुत गरेका थिए। यसै उत्कृष्ट कामबापत उनले २०१४ मा 'स्क्रिन एक्टर्स गिल्ड अवार्ड' समेत प्राप्त गरेका थिए। सिरिजमा उनको यो प्रभावकारी भूमिकाले हलिउडमा अपाङ्गता भएका पात्रहरूको प्रतिनिधित्वका लागि नयाँ ढोका खोलेको थियो।

अभिनय बाहेक मिट्टे एक परोपकारी व्यक्तित्व र सामाजिक अभियानकर्ताको रूपमा परिचित थिए। उनका प्रतिनिधि शोन रिलेका अनुसार, उनले युनाइटेड सेरेब्रल पाल्सी र श्राइनर्स चिल्ड्रन्सका दूतका रूपमा सक्रिय भूमिका निर्वाह गरेका थिए। साथै, सामुदायिक पहलहरूलाई समर्थन गर्न उनले 'द मिट्टे फाउन्डेसन' को स्थापना गरेका थिए। उनले आफ्नो ख्याति र मञ्चको प्रयोग सधैँ समाजका रूढिवादी सोचलाई चुनौती दिन र मनोरञ्जन क्षेत्रमा विकलांगहरूको सशक्त प्रतिनिधित्व बढाउनका लागि गरेका थिए।

आरजे मिट्टेको अल्पायुमै भएको यस आकस्मिक निधनले हलिउड जगत र उनका फ्यानहरूलाई स्तब्ध बनाएको छ। 'ब्रेकिंग ब्याड' मा जेसी पिङ्कमनको भूमिका निभाउने सह-कलाकार आरोन पलले आफू विक्षिप्त र भित्रैदेखि टुटेको महसुस गर्दै भावुक श्रद्धाञ्जली अर्पण गरेका छन्। त्यस्तै, सिरिजमा उनका काका ह्यांक श्रेडरको भूमिका खेल्ने डीन नोरिसले पनि मिट्टे एक अत्यन्त प्यारा युवा रहेको र सेटमा सधैँ सानो बच्चा जस्तै माया पाएको स्मरण गर्दै गहिरो शोक व्यक्त गरेका छन्।

'ब्रेकिंग ब्याड' बाहेक उनले 'हन्ना मोन्टाना', 'स्विच्ड एट बर्थ', 'वेस्टह्याम्पटन' र यसै वर्षको सुरुमा रिलिज भएको 'टकिङ टु स्ट्रेंजर्स' जस्ता अन्य अन-स्क्रिन परियोजनाहरूमा पनि काम गरेका थिए।