केपी ओलीले दिवंगत विजय पौडेलको निवासमा पुगेर परिवारजनमा समवेदना व्यक्त गरे

काठमाडौं । नेकपा एमालेका अध्यक्ष केपी शर्मा ओलीले दिवंगत डा. विजय पौडेलको निवासमा पुगेर परिवारजनप्रति समवेदना व्यक्त गरेका छन् ।

Watch On

असोज २६ गते निधन भएका पौडेलको निवासमा मंगलबार असोज २७ गते पुगेका ओलीले शोकसन्तप्त परिवारका सदस्यलाई भेटेर दुःख व्यक्त गरेका हुन् ।

डा. पौडेल नेकपा संयुक्तका नेता, पूर्वसांसद तथा सञ्चार उद्यमी थिए । ६० वर्षीय पौडेलको सोमबार कीर्तिपुर अस्पतालमा निधन भएको थियो । अस्पतालका कार्यकारी निर्देशक डा. किरण नकर्मीका अनुसार उनलाई अस्पताल पुर्‍याउँदा नै मृत्यु भइसकेको थियो ।

पौडेल लामो समय नेकपा एमालेको राजनीतिमा सक्रिय थिए । एमालेमा रहँदा उनी पार्टीको राजनीतिमा सक्रिय भूमिका निर्वाह गर्थे । एमाले विभाजनपछि माधवकुमार नेपाल नेतृत्वको समूहसँगै उनी नेकपा एकीकृत समाजवादीमा आबद्ध भएका थिए ।

एकीकृत समाजवादी र तत्कालीन नेकपा माओवादी केन्द्रबीच एकता प्रक्रिया अघि बढेपछि त्यसमा असहमति जनाउँदै उनी नेकपा संयुक्तमा लागेका थिए । पछिल्लो समय उनी घनश्याम भूसाल नेतृत्वको नेकपा संयुक्तमा सक्रिय थिए ।

राजनीतिसँगै पौडेल सञ्चार क्षेत्रमा पनि संलग्न थिए । उनी जनता टेलिभिजनका अध्यक्ष तथा सञ्चालक थिए । टेलिभिजन सञ्चालकहरूको छाता संस्था मिडिया एलायन्स नेपालका कार्यसमिति सदस्यसमेत रहेका पौडेलको निधनले राजनीतिक र सञ्चार क्षेत्र दुवैमा शोक छाएको छ ।

पौडेल पुराना वामपन्थी नेता तथा साहित्यकार मोदनाथ प्रश्रितका छोरा हुन् । उनको निधनप्रति विभिन्न राजनीतिक दलका नेता तथा सञ्चार क्षेत्रका व्यक्तिहरूले दुःख व्यक्त गर्दै श्रद्धाञ्जली अर्पण गरेका छन् ।

पौडेलको निधनसँगै नेपाली वामपन्थी राजनीतिमा लामो समय सक्रिय रहेका एक नेता तथा सञ्चार उद्यमी गुमेका छन् ।