खगेन्द्र सुनारमाथि निष्पक्ष छानबिन गर्न एमाले प्रचार विभाग प्रमुख आचार्यको माग

काठमाडौं । नेकपा एमालेका प्रचार विभाग प्रमुख निरज आचार्यले राष्ट्रिय स्वतन्त्र पार्टी (रास्वपा) का सांसद खगेन्द्र सुनारमाथि लागेको आरोपमा निष्पक्ष र स्वतन्त्र छानबिन गर्न माग गरेका छन् ।

Watch On

महिलालाई ज्यान मार्ने, रगत पिउनेलगायत धम्की दिएको भनिएका अडियो सार्वजनिक भएपछि आचार्यले यस विषयमा पार्टीको आन्तरिक छानबिन मात्रै पर्याप्त नहुने बताएका हुन् ।

‘हिजो शोषित, पीडित र दलित समुदायको न्यायका लागि बोल्नेहरू आज सत्ताको आडमा महिलालाई नै डर र धम्की दिने आरोपमा मुछिनु विडम्बनापूर्ण छ,’ आचार्यले भनेका छन् ।

उनले रास्वपाले गरिरहेको छानबिनसँगै सरकारले र सम्बन्धित राज्यका निकायले पनि घटनाको निष्पक्ष र स्वतन्त्र अनुसन्धान गर्नुपर्ने बताएका छन् ।

‘दलितको अधिकारको नारा लगाउनु र महिलाको सम्मानको रक्षा गर्नु फरक कुरा होइनन्—दुवै न्यायका आधार हुन्,’ आचार्यले भनेका छन्, ‘महिला होस् वा दलित, कमजोर होस् वा शक्तिशाली, कसैलाई पनि धम्की र अपमान सहन बाध्य पार्न पाइँदैन ।’

आचार्यले सत्ता कसैलाई पनि कानुनभन्दा माथि उठ्ने छुट नभएको उल्लेख गर्दै आरोप प्रमाणित भए पद, पार्टी र पहुँच नहेरी कानुनअनुसार कारबाही गर्नुपर्ने बताएका छन् ।

उनले आरोपको निष्पक्ष छानबिन गर्न र पीडित भनिएकी महिलाको सुरक्षा सुनिश्चित गर्नसमेत माग गरेका छन् ।

सुनारमाथि एक महिलालाई धम्की दिएको आरोपसम्बन्धी अडियो सार्वजनिक भएपछि रास्वपाले घटनाबारे छानबिन गर्ने जनाएको छ । आरोपबारे स्वतन्त्र अनुसन्धान गरी सत्यतथ्य सार्वजनिक गर्नुपर्ने मागसमेत उठिरहेको छ ।