पूर्वउपसभामुख इन्दिरा राना मगर किन गइन् बैंकक?

काठमाडौं । प्रतिनिधिसभा सदस्य एवं पूर्वउपसभामुख इन्दिरा राना मगर थाइल्यान्डको राजधानी बैंकक प्रस्थान गरेकी छन् ।

Watch On

बैंककमा अक्टोबर १४ मा आयोजना हुने ‘ग्लोबल थ्रेड एलायन्स (जिटिए) उच्चस्तरीय कार्यशील शिखर सम्मेलन तथा क्यापिटल राउन्डटेबल’मा सहभागी हुन उनी मंगलबार त्यसतर्फ प्रस्थान गरेकी हुन् ।

‘द मरिडियन कलेक्टिभ’ले आयोजना गर्ने उक्त अन्तर्राष्ट्रिय सम्मेलनलाई सांसद रानामगरले सम्बोधन गर्ने कार्यक्रम छ ।

दक्षिण तथा दक्षिणपूर्वी एसियाको कपडा उद्योगलाई वातावरणमैत्री बनाउने, कार्बन उत्सर्जन घटाउने, हरित प्रविधिको प्रवर्द्धन गर्ने तथा क्षेत्रीय सहकार्य अभिवृद्धि गर्ने उद्देश्यले सम्मेलन आयोजना गर्न लागिएको हो ।

द मरिडियन कलेक्टिभकी प्रमुख कार्यकारी अधिकृत (सीईओ) ऋत्विका भट्टाचार्यका अनुसार सम्मेलनमा नवीकरणीय ऊर्जा, ऊर्जा तथा उत्पादन प्रक्रियाको दक्षता, पानीको पुनःप्रयोग, हरित उत्पादन र जलवायु वित्तका संयन्त्रलगायत विषयमा छलफल हुनेछ ।

कपडा तथा टेक्सटाइल क्षेत्रमा दिगो विकास, क्षेत्रीय सहकार्य र नीतिगत योगदानका विषयमा अनुभव तथा विचार आदानप्रदान गर्न सांसद रानामगरलाई आयोजक संस्थाले मुख्य सहभागीका रूपमा निमन्त्रणा गरेको जनाएको छ ।

सम्मेलनमा विभिन्न क्षेत्रका प्रतिनिधिहरूबीच वातावरणमैत्री उत्पादन प्रणाली र जलवायु परिवर्तनका चुनौती सामना गर्न आवश्यक सहकार्यबारे छलफल हुने अपेक्षा गरिएको छ ।

सांसद रानामगर बिहीबार स्वदेश फर्किने कार्यक्रम छ ।